“Адолат”да  ёшлар учун “Очиқ эшиклар куни”

30 июнь – Ёшлар куни муносабати билан “Адолат” СДП Фарғона вилоят Кенгаши  томонидан “Очиқ эшиклар куни” ўтказилди. Унда вилоятимизнинг шаҳар-туманларидаги умумтаълим мактаблари ўқувчи-ёшлари, олийгоҳ талабалари иштирок этишди.

Ёшлар аввало сиёсий партия фаолияти билан яқиндан танишдилар. Айнан “Адолат” СДПнинг давлат ва жамият ривожидаги роли ва ўрни, Сайловолди дастурида кўзда тутилган таклиф ва ташаббуслари,   депутатларнинг фаолияти  ҳусусида партия вилоят Кенгаши раиси в.б Адҳамжон Умаров тушунча берди. Шунингдек, Ўзбекистон Республикаси Конституциясига ўзгартириш ва қўшимчалар киритиш жараёнида ўз таклифлари билан партия фаоллари, депутатлар фаол иштирок этаётганлиги  билдирилди.Сиёсий партиялар фаолияти ҳақида кўп маълумотга эга эмасдим, – дейди  Фарғона туманидаги 40-умумтаълм мактаби ўқувчиси Нозима Шавкатжонова.  — Бугунги тадбир менга жуда ёқди. Кўплаб маълумотларга эга бўлдим, билимларим янада бойиди. Албатта, ёшлар сиёсий   партиялар фаолияти ҳақида билиши, уларнинг мақсад ва вазифаларини тўғри тушунмоғи керак.  Сиёсий саводхонлигимизни мунтазам ошириб борсак, келгусида ўз ҳуқуқимиздан тўғри  фойдалана оламиз.  

 Иштирокчилар тадбир давомида партиянинг ишлаш тартиби, лойиҳалари, ёшларнинг қизиқишига қараб уларни сиёсий фаоллигини ошириш,  иқтидорларини  қўллаб-қувватлаш, рағбатлантириш сингари амалий жараёнлар ҳақида ўзларини қизиқтирган саволларига жавоб олдилар.

–  Ёшлар доимо ўз мақсадлари сари дадил интилади ва жамиятда ўз ўрнини топишга ҳаракат қилади. Ташкилотларда ўтказилаётган бундай мазмундаги тадбирлар эса  бизнинг мақсадимизни янада ойдинлаштиради. 

Сиёсий билимларни оширади ҳамда давлат ташкилоти тузилмалари ҳақида тўлақонли тасаввурга эга бўлиш имконини беради, –– дейди  Фарғона давлат университети талабаси  Аслиддин Ҳасанов. –  Партияга анчадан буён аъзо бўлиш истагим бор эди, бугун тадбир баҳона керакли ҳужжатларни билиб олдим.   Аъзо бўлиб, Кенгаш қошидаги  “Ёш адолатчилар” қаторида  мен ҳам  мамлакатимиз ҳаётидаги сиёсий жараёнларда фаол иштирок этиб бораман.

 “Адолат” СДП Фарғона вилоят Кенгаши

Матбуот хизмати.