“Адолатчилар” вакцина олишмоқда, сизчи?

Коронавирус пандемиясига қарши ишончли ва мустаҳкам ҳимоя вакцинация экан, дунёнинг аксарият давлатлари аҳолини оммавий эмлаш тадбирларига катта эътибор қаратмоқдалар. Юртмизда ҳам бу учун тиббий тайёргарлик етарли даражада. Вакцинага қарши эмланишнинг аҳамияти фаол тарғиб қилиниб, аҳоли орасида тушунтириш ишлари олиб борилмоқда, акциялар ўтказилмоқда.

Бугун “Адолат” СДП Сиёсий Кенгаши Марказий аппарати ҳамда партиянинг Тошкент шаҳар Кенгаши ходимлари тиббий кўрикдан ўтказилиб, шифокор кўрсатмасига биноан эмланишга тайёр деб топилган ва ўз розилигини билдирган бир гуруҳ ходимлар вакцина қабул қилди.

-Олдинда сайлов, кенг жамоатчилик ичига кириб борамиз, оммавий тадбирлар ўтказамиз. Бундай шароитда ҳар ким ўзи ва атрофидагилари соғлиғи муҳофазаси ҳақида қайғуриши керак, деб ўйлайман. Шу сабаб, имкониятдан фойдаланиб, коронавирусга қарши эмландим – деди Марказий аппарат бошқарма бошлиғи Гулнисо Саидова.

-Иш жойимизга ташриф буюрган шифокор ва ҳамширалар ҳозирги шароитда вакцина олиш нақадар зарурлигини, бундан чўчимаслик кераклигини тушунтиришгач, мен ҳам эмланишга рози бўлдим. Барчага хотиржам яшаш, соғлом тан билан меҳнат қилиш учун эҳтиёт чораларини кўриш, вакцинани ортга сурмасликни маслаҳат бераман – деди Тошкент шаҳар Кенгаши ижрочи котиби Мадина Иброҳимова.

Бугун эмланган барча ходимларга ZF-UZ-VAC вакцинаси қўлланилди. Бир ойдан сўнг вакцинанинг давомий иккинчи дозаси юборилиши маълум қилиниб, эмлангандан кейин амал қилиниши лозим бўлган қоидалар тушунтирилди.

“Адолатчилар” – оммавий вакцина тарафдори, сизчи?  

“Адолат” СДП Матбуот хизмати