Амир Темур таваллудининг 686 йиллиги муносабати билан маънавий-маърифий тадбир ташкил этилди

Жорий йилнинг 8 апрель санасида Тошкент шаҳар, Миробод туманида жойлашган «Темурбеклар мактаби» ҳарбий академик лицейи тадбирлар залида, Ўзбекистон «Адолат» СДП Сиёсий Кенгаши билан ҳамкорликда буюк бобокалонимиз Амир Темур таваллудининг 686 йиллиги муносабати билан маънавий-маърифий тадбир ташкил этилди.

«Темурбеклар мактаби» ҳарбий академик лицейи жамоаси ва ўқувчи ёшлари, Ўзбекистон «Адолат» СДП Марказий аппарати ходимлари, Тошкент шаҳар Яккасарой туманидаги 89 сонли мактаб раҳбарияти, Республика маънавият-маърифат маркази раҳбарияти, санъаткорлар ва ОАВ вакиллари иштирок этган мазкур тадбирни «Темурбеклар мактаби» ҳарбий академик лицейи директори Касимов Рустам Гулямович ўз кириш сўзи билан очиб берди.

Шунингдек тадбир давомида Ўзбекистон «Адолат» Сиёсий Кенгаши раиси ўринбосари Раҳмонов Абдукамол Шодиевич ҳам сўз олиб, Соҳибқирон Амир Темур бобомизнинг давлат бошқарувидаги оқилона сиёсати, халқпарвар, миллатпарвар ғоялари, Ўрта Осиёда марказлашган давлат тузиш мақсадида босиб ўтган машаққатли ҳаёт йўли ҳақида гапириб ўтди.

Тарих ҳамма замонларда инсониятнинг бугуни ва эртанги истиқболига хизмат қилувчи ибрат мактаби сифатида ўрганилган, тадқиқ этилган. Шу нуқтаи назардан соҳибқирон Амир Темур бобомизнинг ўтмишда босиб ўтган йўллари ҳам бугунги кун авлодларига ғоятда қўл келувчи муҳим манбалардан бири саналади. Буюк саркарданинг адолат бош мезон қилиб олинган ислоҳотлари, миллий анъана ва қадриятларни асраб-авайлаш, дунё ҳамжамияти билан дўстлик ва ҳамкорлик алоқаларини ўрнатиш, мустаҳкамлаш, миллатни, давлатни юксалтириш ва ҳимоя қилиш борасида кўмак берадиган энг бебаҳо қўлланмалардан бири десак асло муболаға бўлмайди. Шу боисдан ҳам Соҳибқирон Амир Темурнинг таваллуд топган куни мамлакатимизда ҳар йили кўтаринки руҳда кенг нишонланади.

Тадбир давомида тақдим этилган гўзал куй-қўшиқлар, театрлаштирилган турли саҳна кўринишларидан иборат байрам дастури барчага бирдек манзур бўлди.

«Адолат»СДП Матбуот хизмати