Андижонлик «адолатчилар» сайловларда фаол қатнашишга қарор қилди

Айни кунларда мамлакатимизда муҳим сиёсий жараён – Олий Мажлис Қонунчилик палатаси ва маҳаллий вакиллик органларига навбатдаги сайловларга тайёргарлик бошланди. Бу сиёсий партиялар зиммасидаги масъулиятни янада оширди. Сайловларда фаол иштирок этиш ва муносиб номзодларни илгари суриш долзарб вазифа. Ўзбекистон «Адолат» СДП Андижон вилоят кенгашининг XIV пленуми олдига айни шу масала қўйилди.

Партия вилоят кенгаши аъзолари, ҳудудий кенгашларнинг раислари ва ОАВ вакиллари иштирокидаги пленумда бу йилги сайловлар биринчи бор аралаш сайлов тизимида ўтиши, бунинг учун сайловчилар ишончини қозониш зарурлигига алоҳида эътибор қаратилди. Партиянинг сайловолди дастури билан бир қаторда номзодлар ҳам ўз дастурларини халқчил, жамоатчиликнинг истакларидан келиб чиқиб тайёрлаши кўрсатиб ўтилди.

Мадаминжон Мадазимов, Ўзбекистон «Адолат» СДП Андижон вилояти кенгаши раиси:

-Аввалги сайловлардан фарқли равишда олдимизда катта вазифа турибди. Жамоатчилик орасида янги тартибдаги сайлов тизими юзасидан кенг тушунтириш ишларини олиб бориш лозим. Аралаш тизим сайловчиларнинг овозларини тўлиқроқ ҳисобга олишга ҳисса қўшади ва республикамизда сайлов қонунчилиги мустаҳкамланиб бораётганини кўрсатади. Бунда сиёсий партияга сайловчиларнинг ишончини ошириш зарур. Эътиборли яна бир томони энди бўшаб қолган депутатлик ўринлари сайловларда тақдим этилган сиёсий партияларнинг рўйхатидаги номзодлар ҳисобидан тўлдирилади. Бу сайловларни ўтказиш билан боғлиқ давлат бюджети харажатларини қисқартиришга хизмат қилади.

Пленумда сўз олганлар белгиланган вазифаларни фаоллик билан амалга ошириш ва соғлом рақобат асосида ўтадиган сайловларда «Адолат» СДПнинг ўрнини мустаҳкамлаш юзасидан ўз таклифларини билдирди.

Шунингдек, пленумда вилоят партия кенгашининг 2024 йил 6 ойликдаги фаолияти юзасидан ҳисоботи тўғрисидаги ва ташкилий масалалар ҳам кўрилди.

Ўзбекистон «Адолат» СДП
Андижон вилояти кенгаши
Матбуот хизмати.