Беғараз донорлик акцияси – Хоразмда

Маълумки, Ўзбекистон “Адолат” СДП ташаббуси билан “Бор меҳримиз сенга, болажон!” акцияси Хоразм вилоят  Қон қуйиш марказида қизғин давом этмоқда.

Бугун мазкур акцияда партиянинг Хива туман Кенгаши ҳам фаол иштирок этмоқда. Унда  Хива туманидаги ДХХ Чегара Қўшинлари 9203 ҳарбий қисм 4-чегара қўриклаш взводи офицерлари  бемор болажонларга беғараз донорлик қилишмоқда.

Қон топширганлик тўғрисидаги маълумотлар вилоят кўп тармоқли болалар шифохонасининг “Гематология” бўлимида даволанаётган болажонларга тақдим этилади.

Шукурой Мадаминова, Хива туман Кенгаши раиси:

-Бир неча кундан буён давом этаётган донорлик акциямизга хивалик ҳамюртларимиз ҳам бефарқ бўлмадилар.  Мурожаатимизни қўллаб-қувватлаб, биз билан елкама-елка туриб,  кўнгиллилар қаторида берган  беғараз ёрдамлари учун офицерларга Кенгашимиз номидан миннатдорчилик билдирамиз.

Топширилаётган  қонлар  бемор болажонларимизнинг  дардига  малҳам бўлиб,  соғлом инсонлар сафига қўшилишига ишончимиз комил.

                                                                                                                   Замира АБДУЛЛАЕВА,

Ўзбекистон “Адолат” СДП

Хоразм вилоят Кенгаши матбуот котиби