Бир келиб кетинг, бизнинг туманимизга, метрода....

Йил охирлаб борар экан, инсон ўзини ўзи сарҳисоб қила бошлайди. Ютуғидан қувонади, улгуролмаган ишларини кейинги йил режасига киритади. Янги-янги мақсадларни олдига қўяди.

2020 йил ўзининг “ўзгачалиги” билан ҳам халқимизнинг йил бошида белгилаган режаларини ўзгартиролмади. Ҳеч бир лойиҳа, ҳеч бир қурилиш ишлари тўхтаб қолмади. Куни кеча Тошкент ер усти метроси Сергели йўналишининг ишга туширилганлиги, Сергели тумани Қипчоқ кўчасида қурилган кўприк бунинг яққол исботидир.

Сергели ер усти метро йўналишини лойиҳалаштириш 2017 йилда бошланган эди. Узунлиги 7 километрлик мазкур темир йўлда бешта бекат барпо этилган. Метрополитеннинг “Олмазор” бекати билан оралиқда 580 метрлик туннел қурилиб, ер усти ва ер ости йўллари боғланган. Ушбу йўналишда кунига 35 мингтагача одам қатнаши мумкин. Янги очилган Сергели ер усти метроси Сергели ва Янги ҳаёт туманларида истиқомат қилаётган аҳоли учун жуда катта қулайлик бўлди. Мазкур туманларда транспорт инфратузилмасини янада яхшилашга имкон яратилади.

Қипчоқ қўчасидаги кўприк соатига 12 мингтагача автотранспорт воситаларини узлуксиз ўтказиш имкониятига эга. Энг муҳими, у пойтахтимиздаги иккита йирик кўча – Янги Сергели айланма йўли билан Тошкент халқа йўлини боғлайди. Бу ҳайдовчилар учун анча қулайлик яратади, минглаб транспорт воситалари оқимини ўзига олиб, бошқа кўчалардаги тирбандликни камайтиради.

Давлатимиз раҳбари ҳар сўзларида “Бугунги Ўзбекистон кечаги Ўзбекистон, халқимиз кечаги халқ эмас” деб бот-бот такрорлайдилар. Сергелининг кеча ва бугуни ҳам ўзгачадир.  Халқининг шукронаси, бугунги кунидан розилиги, эртанги кунига ишончи ҳам бўлакдир. Буни ҳеч бир муболағасиз, бир йил олдинги депутатликка номзод ва ҳозирда шу округдан сайланган депутат сифатида айта олишим мумкин.

Дарҳақиқат, 2019 йилнинг сўнгги ойларида Сергели туманига сайловолди учрашувлар чоғидаги ташрифлар, аҳоли билан мулоқотларда тумандаги инфратузилманинг ҳолати, янги уй-жойларнинг қурилиши натижасида аҳолининг кун сайин ошиб бораётганлиги, доимий тирбандликлардан йўл ҳаракатидаги асаббузарликлар, туманда ягона туғруқхонанинг мавжудлиги, бирорта касалхона, музей, олий ўқув юртининг йўқлиги катта эътирозларга сабаб бўларди.

Албатта, номзод сифатида, мамлакатимизда олиб борилаётган ислоҳотлар, босқичма-босқич такомиллашиб бораётган соҳалар, аниқ мақсадли ва манзилли бунёдкорлик ишлари, оқилона давлат сиёсатининг натижадорлиги ҳақида туман аҳолисини бохабар қилиб, шу манзилга ҳам аҳолига қулай ва хавфсиз, узоғини яқин қиладиган транспорт - метро келса, Сергели тумани аҳолиси экологик тоза транспортдан фойдаланса, иш жойига вақтида бориб, ўз оиласи бағрига кечикмасдан етиб келса, шу эмасмикан, халқнинг ишонган вакилининг вазифалари, деб ўйланиб қолар эдим.

Ўзбекистон Республикаси Президенти Ш.Мирзиёевнинг Сергели туманига навбатдаги ташрифлари тасаввуримизга сиғмаган, лекин орзу қилинган метронинг очилиши мени жуда руҳлантириб юборди. Гўёки ваъдани мен берганман-у, халқнинг ишончини йўқотмаслигим учун, Президентнинг ўзлари мени қўллаб-қувватлагандек бўлди. Тўлқинланиб кетдим. Бу катта бир ишонч, улкан масъулият, ваъдага вафо.

Бунинг замирида буюк меҳнат, йил ўн икки ой тинмай ишлаган фидойилар заҳмати, энг асосийси, қурилишнинг бориши давлатимиз раҳбарининг доимий эътиборида бўлди. Бинобарин, сўнгги йилларда Президентимиз Шавкат Мирзиёевнинг ташаббуси билан Тошкент шаҳрида аҳоли учун жамоат транспортини кескин ривожлантириш ва халқаро талабларга мос транспорт тизимини яратишга катта аҳамият қаратилмоқда. Айниқса, ер ости ва ер усти метрополитени йўналишига алоҳида эътибор берилмоқда.

Янги очилган метро замонавий қулайликларга эга. Бекатлар миллий дизайн асосида пардозланган, кириш ва чиқиш ҳудудлари ўзига хос ранг-баранг меъморчилик асосида барпо этилган.  Йўловчилар учун, хусусан, имконияти чекланганлар учун бекатлар платформасида хавфсиз тактил плиткалар ётқизилган. Йўловчиларнинг платформаларга кўтарилиши учун замонавий лифт ва эскалатор, хавфсизликни таъминлаш мақсадида эса бекатларга замонавий видеокузатув ускуналари, IT русумдаги турникетлар ҳамда электр энергиясини тежайдиган ёритиш чироқлари ўрнатилган. Шунингдек, мобиль алоқа ускуналари учун қувватлагичлар ҳам бор. Ҳар бир бекат 12 тагача хорижда ишлаб чиқарилган замонавий иситиш ва совутишга мўлжалланган кондиционерлар билан жиҳозланган.

Минг бор айтгандан кўра, бир бора кўрган афзал. Сергели ва яқинда ташкил топган Янги Ҳаёт туманлари кечаги туманлар эмас. Ҳудуд кун сайин ўзгариб, замонавийлашмоқда. Одамлар Тошкент шаҳрининг қоқ марказидан эмас, айнан шу ҳудуддан макон исташмоқда. Демак бу ҳудуднинг имкониятига, келажагига ишонишмоқда.

Ҳудудимизнинг шукуҳи ўзгача, кўп миллатли аҳолиси ўзгача. Тартиб-интизомли, бирдам, аҳил. Раҳбарлари ёш, шижоатли, қатъиятли. Президент таъкидлаганларидек, “Биз ҳамжиҳатликда кўп нарсаларга қодирмиз”.

Хуллас, бир келиб кетинг, бизнинг туманимизга, метрода....

Гулруҳ АГЗАМОВА,

Ўзбекистон Республикаси Олий Мажлис

Қонунчилик палатаси депутати