Болалар кўнглига меҳр ва қувонч улашилди

Хабарингиз бор, Ўзбекистон «Адолат» СДП томонидан ҳар йили анъанавий тарзда «Бор меҳримиз сенга, болажон!» беғараз донорлик акцияси, қолаверса, «Хаста дилларга меҳр бер» акцияси доирасида бемор болажонларга қувонч улашиш мақсадида «Янги йил кўчма арчаси» ва бошқа байрам тадбирлари ўтказиб келинмоқда. Ана шундай эзгу мақсадларни кўзлаган тадбирларнинг навбатдагиси жорий йилнинг 27-28 декабрь кунлари Ўзбекистон «Адолат» СДП Сиёсий Кенгаши Марказий аппарати ҳамда партиянинг Тошкент шаҳар Кенгаши ташаббуси билан Республика ихтисослаштирилган онкология ва радиология илмий-амалий тиббиёт марказида ва Республика Онкология диспансери Тошкент шаҳар филиалида бўлиб ўтди.

Партия томонидан ёш авлодни соғлом ва ҳар жиҳатдан баркамол қилиб вояга етказиш мақсадида амалга оширилаётган хайрли лойиҳаларнинг узвий давоми сифатида ўтказилаётган мазкур Янги йил байрам тадбирларида Олий Мажлис Қонунчилик палатаси ҳамда маҳаллий Кенгаш депутатлари, партия Сиёсий Кенгаши Марказий аппарати ва партиянинг Тошкент шаҳар Кенгаши ходимлари, «Ёшлар парламенти» аъзолари, Республика ихтисослаштирилган онкология ва радиология илмий-амалий тиббиёт маркази Тошкент шаҳар филиали ҳамда Республика Онкология диспансери Тошкент шаҳар филиали шифокорлари, партия фаоллари, даволанаётган бемор болажонлар, уларнинг яқинлари ҳамда ОАВ вакиллари иштирок этди.

Айтиш жоизки, тиббий-ижтимоий кўмакка муҳтож болаларни қўллаб-қувватлаш, бемор болаларни ҳолидан хабар олиш ва уларга байрамона кайфият улашиш, жамиятда инсонпарварлик ва меҳр-оқибат ғояларини тарғиб қилишни мақсад қилган ушбу тадбирлар яқинлашиб келаётган Янги – 2023 йил байрам тадбирлари олдидан ташкил этилгани меҳр талаб болажонлар учун байрамга муносиб туҳфа бўлди. 

Тадбирларга Янги йил шодиёналарининг муҳим қаҳрамонлари бўлмиш қорбобо ва қорқиз, қолаверса бир қатор санъаткорлар ташриф буюриб, бемор болажонлар юзига табассум олиб кирди.

Шунингдек, турли эртак қаҳрамонларининг иштироки болажонлар кайфиятини аъло даражага кўтарилишига сабаб бўлди. Бир-биридан қизиқарли цирк томошалари эса кўпчиликнинг диққат-эътиборини ўзига жалб этиб, барчани ҳайратлантирди.

Тадбирлар якунида бемор болажонларга партиянинг эсдалик совғалари туҳфа этилди. Шунингдек, партиянинг мазкур хайрли ташаббусларини қўллаб-қувватлаб келаётган ҳамда уларни амалиётга татбиқ этишда ва шу каби байрам тадбирларини ташкил этилишида яқиндан ҳамкорлик қилаётган бир қатор соҳа вакилларига миннатдорчилик билдирилди.

«Адолат» СДП Матбуот хизмати