БОР МЕҲРИМИЗ СЕНГА БОЛАЖОН!

Донорлик – шарафли ёрдам, мислсиз савоб, хайрли тадбир. Баъзида кимдир учун бир томчи қон яна бир янги ҳаётни англатади. шунингдек, фавқулодда вазиятларда жароҳат олган инсонлар, айниқса, жажжи болажонлар кўп қон йўқотиши натижасида уларнинг ҳаёти қил устида бўлиб қолади. Бундай беморларни малакали мутахассислар жаҳон андозаларига мос тажрибалар асосида даволаш баробарида донорларнинг беминнат ёрдамларига ҳам таянадилар.

Айниқса, ушбу хайрли амаллар кимнингдир соғлиғини сақлашга, ҳаётини узайтиришга кўмак берадиган бўлса, ўша инсон ўзини янада бахтли ҳис этади. Донорлар ана шундай беғараз ёрдам кўрсатувчи эзгу ниятли кишилардир.

“1 июнь – Халқаро болаларни ҳимоя қилиш куни” муносабати билан Республика қон қуйиш марказида ўтказилган донорлик акцияси давомида вазирлик ва идоралар, тижорат ташкилотлари, барча даражадаги депутатлар, фаоллар, партия фаоллари, кўплаб кўнгилли юртдошларимиз  бемор болалар хаётини сақлаш учун ўз ҳиссасини қўшиб, фаол иштирок этиб келишмоқда.

Мана шундай эзгу амаллардан бири Фавқулодда вазиятлар вазирлиги Академиясида 2022 йилнинг 2 июнь куни “Адолат” социал – демократик партияси Сиёсий Кенгаши Марказий аппарати билан Академия ҳамкорлигида “Бор меҳримиз сенга болажон!” шиори остида республика марказий қон қуйиш маркази сайёр гуруҳи бўлим бошлиғи Зулфия Исмаилова раҳбарлигида бир гуруҳ мутахассис врачлар ва ҳамширалар томонидан беғараз донорлик акциясини ўтказилди.

Мазкур инсонпарварлик ва меҳр-шавқат каби эзгу ниятларни ўзида жамлаган донорлик аксияда Академиянинг ҳарбий хизматчилари ва курсантлар фаол иштирок этдилар.

Ҳар йили анъанавий равишда “Адолат” социал – демократик партияси Сиёсий Кенгаши Марказий аппарати билан Академия ҳамкорлигида “1 июнь – Халқаро болаларни ҳимоя қилиш куни” ва
“3 декабрь – Халқаро ногиронларни ҳимоя қилиш куни”да ўтказиладиган хайрия акцияси тиббий-ижтимоий ёрдамга муҳтож болаларни қўллаб-қувватлаш, бемор болалар ҳаётини сақлаб қолиш, шунингдек, жамиятда инсонпарварлик ва меҳр-оқибат ғояларини тарғиб қилишга қаратилган.

Меҳр-оқибатни азалий қадриятларимиз қаторида эъзозлаб келувчи, хайр, эҳсон, савоб каби юксак тушунчаларни одамийликнинг энг олий жиҳати деб билувчи халқимизнинг нечоғлик савобталаб эканлигига бугунги акция иштирокчилари яна бир бор амин бўлдилар.

Тадбир якунида партия ташаббуси билан ташкил этилган акцияда кўнгилли равишда бемор болажонлар ҳаётини сақлаб қолиш учун донорлик аксиясида фаол қатнашган ҳарбий хизматчилар ва курсантларга партиянинг ташаккурномаси ва эсталик совғалари топширилди.

Академия Матбуот хизмати