Шарқшунослик институтида китоб тақдимотига бағишланган тадбир бўлиб ўтди

Жорий йилнинг 20 апрель куни Ўзбекистон Республикаси Фанлар академияси Абу Райҳон Беруний номидаги Шарқшунослик институтида италиялик олим Пьетро Джузеппе Френинг «Числа, книги и бесконечность» номли китобининг тақдимоти бўлиб ўтди. Тадбир Ўзбекистон Республикаси Фанлар академияси Абу Райҳон Беруний номидаги Шарқшунослик институти, Математика институти, Италиянинг Ўзбекистондаги элчихонаси ҳамкорлигида ташкил этилди.

Унда Ўзбекистон Республикаси Фанлар академияси вице-президенти, Шарқшунослик институти директори тарих фанлари доктори, профессор Баҳром Абдуҳалимов сўзга чиқиб, тадбирни очиб берди. Кейин эса, Италия Республикасининг Ўзбекистондаги Фавқулодда ва Мухтор элчиси Агостино Пинна сўзга чиқиб, икки мамлакат ўртасидаги алоқалар ҳақида гапирди.

Шундан сўнг, китоб муаллифи Пьетро Джузеппе Фре сўз олиб, китоб ҳақида йиғилганларга қимматли маълумотларни берди.

Мазкур китоб математика тарихи ҳақида бўлиб, унда математика бир мисоли бир кемага қиёсланади. Ушбу кема эса йиллар уммонида саёҳат қилиб, соҳада етакчи бўлган шахсиятлар билан китобхонни таништириб боради. Унда Платондан тортиб, Герман Вейлгача бўлган математиклар ҳақида ҳикоя қилинади.

Эътиборли жиҳати шундаки, китобнинг тўртинчи боби улуғ ватандошимиз, буюк қомусий аллома, алгебра асосчиси Муҳаммад ибн Мусо ал Хоразмийга бағишланган. Унда алломанинг ҳаёт йўли, фаолияти ҳақида қимматли маълумотлар берилади.

Тадбир ЎзР ФА Математика институти академиклари Шавкат Аюпов ҳамда Абдулла Аъзамовларнинг маърузаси билан давом этди.

Тақдимот якунида йиғилганлар ўзларининг қизиқтирган саволларига китоб муаллифидан жавоблар олди.

Тақдимот 21 апрель куни аллома туғилган замин, Хоразмда ҳам бўлиб ўтади. ЎзР ФА Хоразм Маъмун академияси, Урганч давлат университети ва Италиянинг Ўзбекистондаги элчихонаси ҳамкорлигидаги мазкур тадбир Урганч давлат университетида ташкил этилади.

"Адолат" СДП

Матбуот хизмати