Дастурдаги тиббиёт соҳасига бўлган эътибор барчага маъқул тушди

Айни пайтда “Адолат” социал-демократик партиясидан Ўзбекистон Республикаси Президентлигига кўрсатилган номзод Баҳром Абдуҳалимовнинг Сурхондарё вилояти бўйича ишончли вакили Абдурашид Артиков вилоятнинг шаҳар ва туманларида сайловчилар билан учрашувлар ўтказиб келмоқда.

Навбатдаги учрашув партиянинг Жарқўрғон тумани Тўқимачилик коллежида ташкил этилди. Учрашувда партиянинг маҳаллий Кенгаш депутатлари, таълим соҳаси вакиллари,  маҳалла фаоллари, нуронийлар  ҳамда сайловда илк маротаба қатнашувчи ҳудуд ёшлари иштирок этишди.

Тадбирни “Адолат” социал-демократик партияси вилоят Кенгаши раиси Рустам Ҳамраев кириш сўзи билан очиб, йиғилганларни номзоднинг ишончли вакили Абдурашид Артиков билан таништирди. Ишончли вакил Абдурашид Артиков аввало, номзоднинг таржимаи ҳоли, сўнгра сайловолди дастурини сайловчиларга батафсил таништирди.

Жўрабек Мустапов, Жарқўрғон туман кўп тармоқли поликлиника мудири:

-Хусусан, номзод сайловолди дастурининг соғлиқни сақлаш соҳасидаги ахоли орасида тиббий маданият ва соғлом турмуш тарзининг қарор топишига эришиш, улар саломатлигини мухофаза қилиш, аҳоли ўртача умрини янада узайтириш, кўрсатилаётган тиббий ёрдам сифатини кескин ошириш ва энг аввало оила, мактаб хамда мактабгача таълим муассасалари доирасида болаларни тиббий хизматлар билан таъминлаш самарадорлигини янада ошириш ижтимоий тараққиётимизни жадаллаштиради. Дастурдаги соғликни сақлашда соғлом рақобат муҳитини яратиш, бирламчи бўғин - қишлоқ врачлик пунктларининг моддий-техник базасини тубдан яхшилаш, оилага кўрсатилаётган тиббий хизматлар кўламини янада кенгайтириш, уларни оила тиббий маданиятини юксалтиришга йуналтириш, жаҳон тараққиётида илгарилаб бораётган жараёнларни назарда тутиб, жамиятда аҳолининг тиббий маданиятини ошириш бўйича Миллий дастурни қабул қилиш каби ҳаётий ғоялар мавжудлигини назарда тутилса “Адолат” партиясидан кўрсатилган номзоднинг ўз дастурида тиббиёт соҳасига нақадар катта эътибор берганлиги қувонарлидир.

Шунингдек, тадбир иштирокчилари номзоднинг ишончли вакили А.Артиковдан ўзларини қизиқтирган саволларига жавоблар олишди. 

Тадбир сўнгида иштирокчилар сўз олиб, сайловолди дастурдаги устувор йўналишлар хусусида таъкидлаб, номзоднинг дастурини қўллаб-қувватлашга чорладилар.

Фахриддин ОРИФХОНОВ,

Ўзбекистон “Адолат” СДП Сурхондарё вилояти Кенгаши мафкуравий ишлар бўйича раис ўринбосари