Давлат маслаҳатчисининг хоразмлик шифокорлар билан учрашуви ташкил этилди

Тошкент тиббиёт академияси Урганч филиалида Ўзбекистон Республикаси Президентининг фан, таълим, спорт ва соғлиқни сақлаш бўйича Давлат маслаҳатчиси Абдужаббор Абдуваҳидовнинг  хоразмлик тиббиёт ходимлари ҳамда бўлажак шифокорлар  билан учрашуви ташкил этилди.

Учрашувда тегишли соҳа вакиллари,  бош шифокорлар,  тиббиёт ходимлари, талабалар ҳамда  оммавий ахборот воситалари вакиллари, журналист ва блогерлар иштирок этишди.

Учрашув даставвалида, Давлат маслаҳатчиси А.Абдувоҳидов  мамлакатимизда  тиббиёт соҳасига қаратилган эътибор ва имкониятлар, фаоллашиб бораётган ислоҳотлар ҳамда келгуси режалар тўғрисида сўз юритди.

Жумладан,  воҳада  фуқароларга сифатли тиббий хизматнинг барқарорлигини янада ошириш,  моддий-техник базасини такомиллаштиришга қаратилган чора-тадбирлар  тўғрисида қайд этди.

Қизғин мулоқотдан сўнг,  савол-жавоб ва фикр-мулоҳазаларга ўтилди.

Иштирокчилар томонидан чет мамлакатларда жаҳон стандартларига жавоб берадиган тиббиёт асбоб- ускуналарни Ўзбекистонга олиб келиш  учун рўйхатдан ўтишда бир қатор муаммолар  тўсиқ бўлаётгани ҳамда  тиббиёт ходимларининг даволанишлари  ва дам олишлари учун  алоҳида шифохоналар, дам олиш уйлари мавжуд эмаслиги тўғрисидаги  фикр ва мулоҳазалар   муҳокама этилди.

Шунингдек, А.Абдувоҳидовнинг ТТА Урганч филиалида таълим олаётган талабалар билан ҳам суҳбати қизғин кечди. Талабаларнинг қизиқтирган саволларига давлат маслаҳатчиси атрофлича жавоб берди. Фикр ва мулоҳазалар алмашилди.

Учрашувнинг иккинчи қисми А.Абдувоҳидовнинг ташаббуси ва иштирокида Урганч шаҳридаги ёшлар спорт мажмуасида тиббиёт ходимларидан таркиб топган жамоалар ўртасида спортнинг мини футбол йўналиши бўйича мусобоқа билан давом этди.

Қувонарлиси,  давлат маслаҳатчиси  онкологлар  жамоаси билан мусобоқада фаол иштирок этди  ва  иштирокчиларга намуна бўлди.

Бир сўз билан айтганда,  саломатлигимиз посбонлари билан бўлиб ўтган учрашув ҳамда  спорт мусобоқаси   соҳа вакилларига  кўтаринкилик бағишлади.

                                                                                                       Замира АБДУЛЛАЕВА,

                                                            Ўзбекистон журналистлар ижодий уюшмаси аъзоси