ФАОЛ ФАХРИЙЛАР ПАРТИЯМИЗ ЭЪТИБОРИДА

«Адолат» СДП Бухоро вилояти Кенгаши ташаббуси билан янги йил олдидан партиянинг бир гуруҳ фахрий фаоллари тақдирландилар.

Партия вилоят Кенгаши фаоллар залида бўлиб ўтган тадбирда сўзга чиққан вилоят Кенгаши раиси Мақсуд Ҳамидов йиғилган фахрий фаолларнинг иштироки учун ўзининг миннатдорчилигини билдириб ўтди. Ҳамда яқинлашиб келаётган янги йил байрами билан барчани табриклаб, янги йил омад ва муваффақиятлар йили бўлишини тилади.

Фаолларнинг жамият равнақи йўлида олиб бораётган самарали ижтимоий фаолияти, партиянинг дастурий мақсадларини ҳаётга татбиқ қилиш, ғояларини оммалаштириш ва электорат манфаатлари йўлида амалга оширган ишлари ҳамда бугунги ижтимоий-сиёсий ҳаётдаги фаол иштирокининг юртимиз ривожи йўлидаги ҳиссасини эътироф этиш албатта қувончлидир.

Бугунги кунда вилоят Кенгашининг кўплаб фахрий фаоллари партия лойиҳаларини ҳаётга татбиқ этишда, аҳоли орасида партиянинг танилувчанлигини оширишда кўплаб халқчил ғояларни илгари суриб, ташаббус кўрсатмоқдалар. Жумладан, Бухоро давлат Тиббиёт институти кафедра мудири, профессор Абдурашид Облоқулов ҳам партия ташкил этилганининг илк кунлариданоқ ҳозирга қадар партия ғояларини аҳоли орасида кенг тарғиб этишда ўзининг муносиб ҳиссасини қўшиб келмоқда.

- Мана 26 йилдан буён «Адолат» СДП фаолиман. Ушбу партиянинг вилоят Кенгаши билан ҳамкорликда халқ орасида кўплаб тадбирлар уюштирдик, партия лойиҳаларини амалга оширдик. Оз бўлсада, юртимиз тараққиёти йўлида ўз ҳиссамизни қўшганимиздан хурсандмиз. Албатта қилинган меҳнатлар бесамар кетмайди, табиийки, биз «Инсон қадри» улуғланган юртда яшаяпмиз. Қайд этиш лозимки, Юртбошимиз томонидан «Ҳаракатлар стратегиясидан – Тараққиёт стратегияси сари» тамойили асосидаги Янги Ўзбекистоннинг тараққиёт стратегияси эълон қилинди. Ушбу стратегияда бош мезон этиб белгиланган «Инсон қадри учун» деган тамойил ҳар бир фуқарога муносиб турмуш шароитини яратишни кўзда тутганлиги билан ниҳоятда аҳамиятлидир. Бу каби халқчил тамойиллар албатта бизларни ҳам қувонтирмай қолмайди, - дейди, партиянинг фаол фахрийси, Бухоро давлат Тиббиёт институти кафедра мудири, тиббиёт фанлари доктори Абдурашид Облоқулов.

Тадбир сўнгида бир гуруҳ партиянинг фахрий фаоллари байрамолди эсдалик совғалари ҳамда фахрий ёрлиқлар билан тақдирландилар.

«Адолат» СДП Бухоро вилоят Кенгаши матбуот хизмати