Фарғонанинг “Адолатли қайнона”лари сараланяпти

Аёлларимизнинг латофати, закийлиги, меҳрибон ва оқилалиги доимо энг латиф сўзлар билан таърифланган. Келин бўлиб, янги оила аъзоларига,  қайнона-қайнотасига хизмат қилиш давомида эса унинг сабр, камтарлик ва меҳнатсеварлик ҳислатлари эътироф этилади. Қолаверса вақтики келиб, ўзга бир хонадон фарзандини бағрига олганида унга адолатли  муносабатда бўлиб, хатоларини кечира олиши, адашса тўғри йўлга солиши ҳам мардоналиги, бағрикенглиги нишонасидир. Айнан қайноналардаги адолатлилик ёш оилаларни мустаҳкамлаш, уларни  тинчлигини таъминлаш, ажримларнинг олдини олишда муҳим аҳамиятга эга.

Ўзбекистон “Адолат” СДП томонидан ташкилланган  аёлларимизни  адолатли қайнона бўлишга ундаш, уларни  оилада, жамиятда тутган ўрнини янада юксалтиришга қаратилган “Адолатли қайнона” танлови тобора оммалашиб бормоқда. Бугунги кунда Фарғона вилоятининг барча ҳудудларида   танловнинг қуйи босқичлари ўтказиб келиняпти.  Партиянинг Учкўприк туман Кенгаши раиси Одинахон Ҳакимова ҳам 20-сонли болалар мусиқа ва санъат мактабида танловнинг кўтаринки руҳда ўтишини таъминлади. Унда маҳаллалардан саралаб олинган 4 нафар қайноналар секторлар кесимида иштирок этишди.  Танлов шартларини   маҳорат билан бажариб, ўзининг қайноналик вазифаларини адо этишдаги масъулияти, оқилалалигини намоён этган ҳоким сектори ҳудудидаги  “Якка мулла” МФЙ  вакили  Мўътабархон Каримова  вилоят босқичига йўлланмани қўлга киритди.

- 3 нафар келиним бор. Уларни доимо тушунишга, қўллаб-қувватлашга ҳаракат қиламан, – дейди  танлов ғолибаси. – Ўзим ўқитувчилик соҳасидан нафақага чиқдим. Албатта ҳозирда ҳам 9 нафар набираларимга илм сирларидан баҳраманд қилиш билан бирга, ҳаёт сабоғидан таълим беряпман.

Тадбирда  туман ҳокими  Акмал Маҳмудалиев иштирок этиб,   ғолибларни тақдирлади.  Оналаримизга ўзининг самимий тилакларини билдирдилар. 

Шунингдек, Қўқон шаҳридан Шаҳодат Сотволдиева, Бувайдадан  Раҳимахон Ҳўжаназарова, Олтиариқ туманидан Турғуной Отақулова танлов ғолибларига айландилар.

 Ўзбекистон “Адолат” СДП Фарғона вилоят Кенгаши матбуот хизмати