Ғоялар тарғиботи кучайтирилмоқда

Ўзбекистон Республикаси Парламенти қўйи палатаси ва маҳаллий Кенгашлари депутатлигига сайлов куни тобора яқинлашмоқда. Шу боис мамлатимизда фаолият юритаётган сиёсий партиялар ўзларининг янги сайловолди дастурларида белгиланган мақсад ва вазифаларини аҳоли орасида кенгроқ тарғиб қилишга ҳаракат қилмоқда.

“Адолат” социал-демократик партияси жойларда ўз ғоялари ва дастурларини кенг жамоатчиликка етказиш, аҳолининг бўш вақтини мазмунли ташкил этишга қаратилган қатор тадбирларни ўтказмоқда.

Шундай тадбирларнинг бири 17 ноябрь куни Ўзбекистон “Адолат” СДП Қонликўл туманида жойлашган «Бахытлы» дам олиш марказида “Адолат”-ҳар бир инсон учун!” шиори остида маданий-кўнгилочар акция ташкил қилинди.

Акцияда партиянинг ҳудудий ва маҳаллий Кенгаши ходимлари, туман Кенгаш депутатлари, фаоллар ва барча кўнгиллилар иштирок этишди. Ушбу «Бахытлы» дам олиш маркази олди аҳолининг кенг қатлам вакиллари, яъни нуронийлар, ёшлар, хотин-қизлар ва умуман турли ёшдаги аҳолининг қатнашгани бу сайловга бўлган халқнинг муносабати юқори даражада эканлигининг бир кўриниши ҳисобланади.  

Тадбирда сўзга чиққанлар бу йилги сайловлар арафасида олға сурилаётган энг муҳим вазифаларга тўхталиб ўтди. Шунингдек, коррупцияга барҳам бериш, суд-ҳуқуқ тизимидаги ислоҳотларни янада чуқурлаштириш ва аҳолига кўрсатилаётган тиббий хизматнинг бепул бўлишига эришишда партия олдида турган вазифаларга урғу берилди.

Акция давомида партия фаолиятига оид лавҳалар, ғоявий чиқишлар, «Ёш адолатчилар» ва «Аёллар қаноти» вакилларининг сўзлари ҳам иштирокчиларда катта қизиқиш уйғотди. Юзма-юз мулоқотлар ва турли масалалар бўйича савол-жавоблар юртдошларимизда “Адолат” СДП ғояларига хайрихоҳлик тобора кучайиб бораётганлигини кўрсатди.

Шунингдек, акция доирасида интерактив ўйинлар, совринли викториналар ҳам ўтказилди. Бу иштирокчилар, айниқса улар орасидаги ёшларни ўзига жалб этиб, фаол қатнашишга ундади. Ғолиблар партиянинг эсдалик совғалари билан тақдирланди.

Ўзбекистон “Адолат” СДП ташаббуси билан ташкил этилган мана шундай акция ва митинглар Қорақалпоғистон Республикасининг барча туманларида ўтказилмоқда.

Ўзбекистон “Адолат” СДП

Қорақалпоғистон Республикаси Кенгаши матбуот хизмати