Халқ саломатлиги – жамиятнинг барқарор ривожланиши гаровидир

Аҳоли саломатлиги - улкан бойлик. Жамиятнинг барқарор ривожланиши гаровидир. «Адолат» СДПнинг «Саломатлик йўлида бирлашайлик» лойиҳаси доирасида амалга оширилаётган тарғибот ва ташвиқот ишлари ҳам халқимиз соғлиғини асрашга қаратилганлиги билан аҳамиятлидир.

Шу жумладан, лойиҳа доирасида партия Бухоро вилоят Кенгаши томонидан вилоят стоматология поликлиникасида «Саломатлигимиз посбонлари» мавзусида давра суҳбати ташкил этилди.

Тадбирни вилоят стоматология поликлиникасининг бош врачи Камол Бакаев кириш сўзи билан очиб, сўзни партия вилоят Кенгаши раиси Мақсуд Ҳамидовга берди. Мақсуд Ҳамидов ўз сўзида партия лойиҳалари доирасида аҳоли орасида амалга оширилаётган тарғибот ва ташвиқот тадбирлари хусусида тўхталиб, ушбу тадбирларнинг оддий халқ ҳаётида нечоғлик катта аҳамиятга эга эканлиги тўғрисида гапирди. Шунингдек, тадбирда шифокорлар билан ҳамкорликда партиянинг дастурий мақсад ва ғояларини халқимиз орасида кенг тарғиб қилиб, ҳаётга татбиқ этилаётгани қайд этилди.

Давра суҳбатида вилоят стоматология поликлиникасининг врачи, бошланғич партия ташкилоти раиси Матёқуб Воҳидовнинг 2021 йилда партия лойиҳалари доирасида аҳоли орасида амалга оширилган ишлари юзасидан ҳисоботи тингланди. Шу билан бир қаторда партия вилоят Кенгаши билан шу йилги режалар тасдиқланиб, партиянинг халқ орасида танилувчанлигини оширишдаги амалий ишлар белгиланиб олинди.

Шундан сўнг партия вилоят Кенгаши раиси Мақсуд Ҳамидов «9 февраль Халқаро стоматологлар куни» муносабати билан барча стоматологларни байрам билан табриклаб, шифокорларга ўзининг илиқ тилакларини билдириб ўтди. Бугун ушбу касбни улуғлаб, халқимизнинг соғлиғи йўлида хизмат қилиб келаётган шифокорларнинг жамиятимиздаги ўрни ниҳоятда беқиёсдир, – дейди, партия вилоят Кенгаши раиси.

Шунингдек, тадбир сўнгида вилоят Кенгаши раиси М.Ҳамидов томонидан байрам муносабати билан вилоят стоматология поликлиникасининг бир гуруҳ шифокорлари партиямизнинг дастурий мақсад ва вазифаларини рўёбга чиқаришдаги, аҳоли орасида тарғибот-ташвиқот ишларини ташкил этишда жонбозлик кўрсатиб, халқимиз соғлиғини сақлашда катта ҳисса қўшганлиги учун партиянинг ташаккурномаси ҳамда қимматбаҳо эсдалик совғалари билан тақдирландилар.

«Адолат» СДП Бухоро вилоят Кенгаши Матбуот хизмати