Хивалик адолатли қайноналар беллашди

Маълумки, Ўзбекистон “Адолат” СДП  ташаббуси билан бир неча йилдан буён халқимиз томонидан қўллаб-қувватланаётган “Адолатли қайнона” кўрик-танловининг  оммалашиб бораётгани партиямизнинг обрў-эътиборини ошириши билан бир қаторда  оилаларда ҳуқуқий саводхонликни ошириш, оилавий тарбияда  адолат ва умуминсоний қадрятларни ўрнини юксалтириш, оила ва никоҳнинг муқаддаслигини ёш авлод онгига сингдириш каби олижаноб фазилатларни  инсонлар ҳаётига татбиқ этишда қўл келмоқда.

Мазкур кўрик-танловнинг Хива туман босқичи ҳам ана шу долзарб бўлган устувор мақсад ва вазифаларни илгари сургани билан аҳамиятли бўлди.

Ҳаётнинг оғир ва енгил синовларини  мардона енгиб, оила ва жамиятда адолат тамойилларини  мустаҳкамлашда белни маҳкам боғлаган  бир гуруҳ адолатли қайноналарнинг   қизғин беллашуви  кўрик-танловнинг  мазмун-моҳиятини яққол кўрсатиб берди.

Партия фаоллари, депутатлари ҳамда ҳамкор ташкилот вакилларидан таркиб топган ҳакамлар ҳайъати танлов шартларини холисона баҳолаб боришди.

Танловда Замира  Султанова  “Энг меҳрибон қайнона” номинацияси ҳамда 3-даражали диплом билан, Муқаддас  Абдуллаева “Энг зукко қайнона” номинацияси ҳамда 2-даражали диплом билан тақдирландилар.  Зукко ва  ҳақиқатгўйлиги  билан барчани ҳайратда қолдирган Ўғилжон Матрасулова  ғолибликни қўлга киритиб,  “Адолатли қайнона” деб топилди ва танловнинг вилоят босқичига йўлланма олди.

-Кўпдан ушбу танловга иштирок этиш иштиёқим тинчлик бермасдан келаётган эди, –дейди Ўғилжон Матрасулова.  - Танловда ғолиб бўлишимга ишончим комил эди. Чунки, кўрик-танловнинг  Низоми билан танишганимда худди юрагимдаги шижоатим акс этгандек  бўлди. Бу кунни сабрсизлик билан кутдим ва ниятим амалга ошди. Танлов жуда ўринли, муносиб ташкил этилган. Вилоят босқичида ҳам ғолибликни  қўлга киритиш учун курашаман.

Шукурой МАДАМИНОВА,

                                                                                                     Ўзбекистон “Адолат” СДП

                                                                                                       Хива туман Кенгаши раиси