Хотира муқаддас, қадр абадий!

Шонли ғалабанинг 77 йиллиги муносабати билан Олий Мажлис Қонунчилик палатаси депутати Қодир Жўраев 9 – май “Хотира ва қадрлаш” куни байрами муносабати билан, ўз сайлов округига қарашли Вобкент туманидаги Иккинчи жаҳон уруши қатнашчилари ҳамда, ёши улуғ отахону онахонлар ҳолидан хабар олиб, байрам билан табриклади.

Жумладан, Олий Мажлис Қонунчилик палатаси депутати Қодир Жўраев тумандаги “Чармгарон” маҳалла фуқаролар йиғини “Имом Бухорий” кўчасида истиқомат қилувчи Иккинчи жаҳон уруши қатнашчиси Турсунов Ҳомид бобо ҳолидан хабар олиб, самимий суҳбатда бўлди. Депутат оловли йилларнинг машаққатларини мардонавор енгиб ўтган отахонни байрам билан самимий табриклади.

Юртимиз тинч, осмонимиз мусаффо бўлсин, тинчлигимизга кўз тегмасин Халқимизнинг бахтига Президентимиз соғ-омон бўлсин, дея дуога қўл очди отахон. 

Шундан сўнг, ОМҚП депутати Қодир Жўраев тумандаги “Вобкент” маҳалла фуқаролар йиғини “Бобир” кўчаси 41-уйда яшовчи фронтортида хизмат қилган 101 ёшли Ҳусайнова Наима момонинг хонадонида бўлиб, ҳолидан хабар олди. Шунингдек, онахонни байрам билан табриклаб, самимий суҳбат қурди.

Депутат Қ.Жўраев ҳамда туман Халқ қабулхонаси раҳбари Л.Шарипова билан биргаликда тумандаги “Сўфидеҳқон” маҳалла фуқаролар йиғинида истиқомат қилувчи 98 ёшли Муртазо Мустақимов,  ҳамда “Косари” маҳалла фуқаролар йиғини “Косари” қишлоғида яшовчи 1926-йилда туғилган Қўзиева Бахшан момонинг хонадонларига ҳам ташриф буюриб, ҳолидан хабар олдилар ҳамда, Хотира ва қадрлаш куни олдидан самимий табрикладилар. Отахону онахонларимиз бугунги дориламон кунларга етиб келганимиз учун беҳисоб шукроналар келтирди. Олий Мажлис Қонунчилик палатаси депутати Қ.Жўраев билан бўлган самимий суҳбат отахону онахонларга ва уларнинг оила аъзоларига байрамона кайфият улашди. Фахрийлар юртимиз тинчлиги, халқимизнинг фаровон ҳаёти, эзгу ниятларимиз ижобатини ҳамда авлодлар бахту камолини сўраб дуога қўл очдилар.

Мухтасар ЗОХИДОВА,

“Адолат” СДП Бухоро вилоят Кенгаши

матбуот котиби