«Инсон қадри» онлайн портали тақдимоти бўлиб ўтди

Бугун партия марказий аппаратида Тараққиёт стратегияси маркази мутахассилари томонидан «Инсон қадри» онлайн портали тақдимоти ташкил этилди.

Тақдимотда партия марказий аппарати, ҳудудий Кенгаш ходимлари, депутатлар ва партия фаоллари иштирок этишди.

«Инсон қадри» (davlatdasturi.uz) номи билан яратилган онлайн порталнинг асосий мақсади ва ундаги имкониятлар ҳақида мутахассислар томонидан тўлиқ маълумот берилди. Жумладан, онлайн портал давлат органларининг аҳоли билан тўғридан-тўғри мулоқотини узлуксиз ва янада самарали давом эттириш, шаффофлик, очиқ-ошкораликни таъминлашга хизмат қилади.

Шуни алоҳида таъкидлаш жоизки davlatdasturi.uz онлайн портали Тараққиёт стратегияси ва Давлат дастуриларининг жойлардаги ижроси натижаларини кенг аҳоли қатламига етказиб бориш ҳамда унинг жойлардаги ижросида бевосита аҳолининг иштирокини таъминлаш мақсадида «Тараққиёт стратегияси» маркази ҳамда Ахборот технологиялари ва коммуникацияларини ривожлантириш вазирлиги билан биргаликда «Инсон қадри» онлайн портали номи билан ишлаб чиқилди.

Эндиликда, «davlatdasturi.uz» онлайн платформаси орқали аҳоли Давлат дастурларида белгиланган чора-тадбирларнинг ижроси билан батафсил танишишлари, шунингдек тегишли йўналиш ва унда амалга оширилиши белгиланган ишлар ижроси юзасидан ўз фикр, таклиф ва эътирозларини билдиришлари ҳам мумкин.

Тақдимот давомида иштирокчилар ўзларининг қизиқтирган саволлари ҳамда таклифлари билан фаол иштирок этишди. Ўйламизки, бу онлайн портал орқали давлат дастурида белгиланган вазифаларни ўз вақтида маъсул ташкилотлар томонидан бажарилишини фуқаролар ҳамда кенг жамоатчилик назорати остида кузатиб бориши, ўзларининг қизиқтирган саволлари ҳамда таклифларини бериши орқали жамият ривожига муносиб ҳисса қўшишга хизмат қилади.

Миршод ҚЎЛДОШЕВ,

“Адолат” СДП Марказий аппарати

бўлим бошлиғи