Интернет тармоғидан фойдаланиш маданияти

Бугунги кунда мамлакатимиз келажаги бўлмиш ёшларга таълим-тарбия бериш уларнинг турли хил маънавий-мафкуравий таҳдидлардан асраш долзарб вазифалардан бири ҳисобланади.

Бекобод шаҳридаги 16-мактабда Ўзбекистон «Адолат» СДП Тошкент вилояти Бекобод шаҳар Кенгаши ташаббуси билан «Интернетдан фойдаланиш маданияти» мавзусида давра суҳбати ўтказилди. Унда «Адолат» СДП Тошкент вилояти Бекобод шаҳар Кенгаши ходимлари, партия фаоллари, Халқ депутатлари туман Кенгашидаги партия депутатлик гуруҳи аъзолари, мактаб ўқувчилари ва «Ёшлар қаноти» аъзолари иштирок этишди.

Тадбирдан сўз олганлар Ер юзида 1,5 миллиарддан ошиқ киши интернетдан фойдаланаётганлиги, Ўзбекистонда 10 миллионга яқин юртдошимиз интернетнинг фаол фойдаланувчиси эканлиги. интернет, айниқса, ёшлар онги ва дунёқарашига кучли таъсир ўтказаётгани, шу сабабли улғайиб келаётган ёш авлодни интернетдаги ахборотни тўғри идрок этишга, мушоҳада қилишга ўргатиш зарурати пайдо бўлаётганини алоҳида таъкидлашди.

Бугунги кунда ахборот оламида Интернет даври келгани, интернет-телевидение, интернет-радио, электрон почта, онлайн-видео каби кўплаб янги ахборот тарқатиш технологиялари тез суратлар билан ривожланиб, уларнинг аудиторияси ва таъсир доираси тобора кенгайиб бораётгани ҳақида ортиқча гапиришга зарурат йўқ, деб ўйлайман. – дейди Ўзбекистон «Адолат» СДП Тошкент вилояти Бекобод шаҳар Кенгаши раиси, шаҳар Кенгаши депутати Гулзира Шарипова. - Бундай ахборот воситаларига асосан ёшларнинг жуда катта қизиқиш билан қараши ва улардан кенг фойдаланишини ҳисобга оладиган бўлсак, ҳақиқатдан ҳам, бу масаланинг нақадар улкан аҳамиятга эга эканини англаш қийин эмас. Шундай экан, ёшларга соғлом ахборот муҳитини яратиб, улар маънавий оламининг дахлсизлигини асраш асосий вазифаларимиздан биридир. Зотан, ёшлар маънавиятига дахлдор юмушларда бепарволикка асло йўл қўйиб бўлмайди.

Тадбир давомида интернетдан фойдаланиш борасида соҳа мутахассислари ҳамда партия фаолларининг таклиф-тавсиялари тингланди.

«Адолат» СДП Тошкент вилояти Кенгаши

Матбуот хизмати.