Истиқлол берган олий бахт бу!

Истиқлол – улуғ неъмат. Ота-боболаримиз асрий орзуси бўлган  давлат мустақиллигига эришгач, ватандошларимизнинг мислсиз меҳнати эвазига бунёд этилган Ўзбекистон давлатининг бугунги қиёфаси дунё эътирофида эканлиги қалбимизни ғурурга тўлдиради.

130дан зиёд миллат вакиллари қўним топган ва ҳамжиҳат яшаётган жаннатмакон диёримизнинг тинчлиги ва тараққиёти ҳар бир юртдошимизнинг ягона мақсадидир. Ватан ичра ватаним, дея ўз ҳовли-жойини, маҳалласини, шаҳрини обод қилаётган замондошларимизнинг залворли меҳнати фақатгина таҳсинга сазовор.

“Бир бўлсак — ягона халқмиз, бирлашсак — Ватанмиз!” деган шиор остида мамлакатимиз мустақиллигининг 33  йиллик шодиёнаси арафасида Фарғона вилоятининг ўзида 200 дан зиёд бино иншоотларнинг фойдаланишга топширилиши ҳам ҳақимизнинг ватан равнақи йўлида янада жипслашиб,  Ўзбекистон аҳлининг янада буюк ишларга қодир эканлигини намоён этишга интилаётганлигининг ёрқин ифодаси бўла олади, десам янглишмаган бўламиз.

Бугун бир сўз билан айтганда, Ўзбекистоннинг янги қиёфаси, янги тараққиётининг бунёдкори ва ижодкори бўлган халқимиз  шу ватан бағрида яшаётганидан бахтиёр эканлигини баралла айта олади. Дунёнинг энг ривожланган давлатларининг байроқлари қаторида ҳилпираётган байроғимиз, ўз ютуқлари билан “Ўзбекистон” номини олам узра жаранглашига сабаб бўлаётган спортчиларимиз, сархил меваларимизу, пахта ва ипак толасидан тайёрланган матоларимиз, либослар барчаси иродаси мустаҳкам бўлган халқимизнинг матонатли меҳнати натижаси.

Юртимизнинг келажаги бундан-да порлоқ эканлигига қалбан ишонамиз ва бундай имкониятларимиз  чексиздир. Байрам муносабати билан барча ватандошларимизни муборакбод этаман. Ҳамиша Ўзбекистон байроғи жаҳон узра мағрур ҳилпирайверсин!

Шаҳноза ҒАНИЕВА,

 “Адолат” СДП

Фарғона вилоят Кенгаши раиси