«Йилнинг энг фаол адолатчи аёли»

Хабарингиз бор, 2021 йил якуни бўйича «Адолат» СДП томонидан жамиятимизда адолат мезонларини қарор топтириш ҳамда партиянинг устувор мақсад ва ғояларини амалиётга татбиқ этишда фаоллик кўрсатаётган хотин-қизларни аниқлаш ва саъй-ҳаракатларини қўллаб-қувватлаш мақсадида партия расмий ижтимоий тармоқларида ташкил этилган сўровномаларнинг натижаси бўйича Халқ депутатлари Нукус шаҳар Кенгаши депутати Улбосын Сейтжанова ижтимоий тармоқ фойдаланувчиларининг энг кўп қўллаб-қувватловига сазовор бўлиб, ғолибликни қўлга киритди. Ғолибимизга партия Сиёсий Кенгаши томонидан махсус диплом ва эсдалик совғалари топширилди.

Улбосын Сейтжанованинг меҳнат фаолиятига назар ташласак, унинг 2001 йилдан «Адолат» СДПнинг фаол аъзоси ва 35 йиллик илмий педагогик тажрибага эга олима, педагогика фанлари номзоди, доцент эканлигига гувоҳ бўламиз.

У кўп йиллик фаолияти давомида минглаб юрт тараққиётига ҳисса қўшиб келаётган шогирд-ёшларни камол топишига сабабчи бўлиш билан бир қаторда 2 та дарслик, 70 дан ортиқ илмий мақолалар ва 12 та ўқув ва методик қўлланмалар муаллифи бўлишга эришган. Қаҳрамонимиз «Ўзбекистон Республикаси халқ таълими аълочиси», «Ўзбекистон Мустақиллигининг 25 йиллиги» ва «Ўзбекистон Республикаси Конституциясининг 25 йиллиги» кўкрак нишонлари ҳамда «Мўътабар аёл» кўкрак нишонлари билан тақдирланган.

У.Сейтжанова нафақат ижтимоий-сиёсий ишларда балки, жамоатчилик асосида «Адолат» СДПнинг Қорақалпоғистон Республикаси Кенгашининг «Аёллар қаноти» раиси сифатида ҳам кўп йиллардан буён фаолият кўрсатиб келмоқда.

Шунингдек, У.Сейтжанова 2004-2009 йилларда ва 2019 йилдан ҳозирги вақтга қадар Халқ депутатлари Нукус шаҳар Кенгаши депутати ҳамда партия депутатлик гуруҳи раҳбари сифатида кўп йиллик бой тажрибага эга салоҳиятли етакчидир.

У.Сейтжанова депутат сифатида ўз сайловчилари билан яқиндан учрашувлар ўтказиб уларнинг муаммоларини тинглаган ҳолда, ҳар бир фуқаронинг мурожаати юзасидан муаммоларни ўз вақтида ўрганишга ҳамда уларнинг қонуний тартибда ҳал этилишига эришиб келмоқда.

Фаол аъзомиз Улбосын Сейтжановани партия Қорақалпоғистон Республикаси Кенгаши ва барча партиядошлар номидан муносиб ғалабаси ва эришган ютуқлари билан самимий муборакбод этамиз!

Бахадыр ЖУЗБАЕВ,

«Адолат» СДП Қорақалпоғистон Республикаси Кенгаши матбуот котиби