Коронавирусга қарши эмланишга шошилинг!

Бугунги кунда дунё юзида коронавирус пандемияси сабабли вужудга келган вазиятдан барчамиз хабардормиз. Соғлиқни сақлаш вазирлигига кўра, дунёда коронавирус билан касалланганлар сони
184 миллионга етган.

Энг хавотирлиси шундаки, коронавирус юқтирган одам, агар организмда иммунитет шу касалликка нисбатан йўқ бўлса, касаллик ривожланиб, ҳеч қандай белгиларсиз ҳам ўпкани яллиғлаб, бирданига ўпка ва нафас етишмовчилигига олиб келиши мумкин. Ушбу касалликка қарши эмланиш эса касалликдан қутилишнинг ягона йўлидир.

Бугунги кунда мамлакатимизда ушбу касалликка чалинганлар сони кун сайин ошиб бораётгани барчамизни бирдек хавотирга солмоқда. Бу кўринмас офатни енгишимизда эса касалликка қарши эмланиш жуда катта аҳамиятга эга.

Ҳозирги кунда бутун дунё мамлакатларида касалликка қарши эмлаш ишлари жадал олиб борилмоқда.

2021 йилнинг июнь ойидаги маълумотларга кўра Исроил, Мальта, Сан-Марино каби давлатларда аҳолининг катта қисми деярли касалликка қарши эмланган ва натижада касаллик кўрсаткичи камайишга эришилган.

Бугунги кунда “...ушбу касаллик менга юқмайди” қабилида иш тутаётган, ҳаётининг, қолаверса яқинларининг ҳаётига хавф солаётганини тушуниб етмаётган фуқароларимизга карантин қоидаларига амал қилишни, жуда катта харажатлар эвазига мамлакатимизга олиб келинган ва ҳеч қандай тўловларсиз давлатимиз ғамхўрлигида амалга оширилаётган вакциналар қадрига етиб эмланишни, иложи борича жамоат жойларига бормасликни, ҳар қандай тадбирларга, тўй ва тамошаларга боришдан тийилишни ва тезкор эмланишни тавсия қиламиз.

Огоҳ бўлинг азизлар, огоҳ бўлинг!!! 

Мухаммад ВАЛИЕВ,

Олий Мажлис Қонунчилик палатаси депутати,

“Адолат” СДП фракцияси аъзоси