Korrupsiyalashgan tizimning kelajagi yo‘q

Mamlakatimiz taraqqiyotida korrupsiya asosiy g‘ov bo‘lmoqda. Davlat tomonidan olib borilayotgan islohotlarda unga qarshi kurash to‘xtamayapti. Korrupsiyaga qarshi kurashish agentligi tuzilib, joylarda ushbu illatni yo‘qotish bo‘yicha ildam ishlar olib borilayotgan bo‘lsada, biroq uning chuqur va mustahkam ildiziga taʼsir qilmayapti. Sabab nima? Albatta, muammo yana jamiyat odamlariga kelib taqaladi. Insonlarning o‘zlari tartib-qoidalarga amal qilmas ekanlar Korrupsiyalashgan tizim chuqurlashsa chuqurlashadiki, aslo kamaymaydi.

Barchamizga yaxshi tanish bo‘lsa kerak. Yaqinda poytaxtda yer usti metrolari qurilib foydalanishga topshirildi. Bundan fuqarolar juda xursand. Metrolar tarmog‘ining kengaygani va chekka hududlarga ham yetib borishi, albatta, ko‘pchilikning orzusi bo‘lgan. Ammo masalani boshqa tomondan olib qaraganda qurilish sifatiga eʼtibor qaratilmagani yoki metro qurilishi uchun ajratilgan pullardan 900 million so‘m kamomad chiqishini qanday izohlash mumkin?! Bu ishlarning boshida turgan mansabdor o‘z foydasi, jig‘ildonini ko‘zlab xizmat vazifasini suisteʼmol qilsa-ya. Loyihaga jalb qilingan pullarni kissasiga ursa, bu ketishda jamiyat qay tomon yuz buradi? Yo‘qlik va jar yoqasiga kelib qolishini va qulashini jimgina kuzatamizmi yoki halokat yuz bermasligi uchun birdamlikda kurashamizmi? Bu yog‘i esa sizu bizga bog‘liq jarayon.

Bu kabi misollarni har qadamda va har yerda uchratish mumkin. Negaki, korrupsiya kirib bormagan soha, eshigini qoqib kirmagan xonadon yo‘q. Unga qarshi qanday kurashamiz, degan savol bizni qiynashi mumkin. Albatta, o‘z xatti-harakatimiz va amallarimiz bilan korrupsiyani yengishimiz mumkin. Pora olish, biror bir ishimizni bitirib olish uchun pora bermasligimiz yoki o‘z xizmat vazifamizda taʼmagirlik, tovlamachilik ishlariga yo‘l qo‘ymasligimiz zarur.

Mazkur metro qurilishida ham shuncha mablag‘ning talon-taroj qilinishida vakolatli mansabdorning o‘z vazifasidan foydalanib xalq haqiga xiyonat qilganini bildik. Bu kabi ishlar tugamas ekan, yorqin kelajakdan umid qilish dargumon.

Bahrom VALIEV,

O‘zbekiston “Adolat” SDP

Toshkent shahar Kengashi raisi