Янгиликлар 2107

Лицейларда ўқиш бошланди, аммо, жиҳозлаш ва бошқа талаблар бажарилганми?

06.11.2020 12:11:37

Халқ депутатлари Самарқанд шаҳар Кенгашининг сессияси кун тартибида “Самарқанд шаҳридаги академик лицейларнинг пандемия шароитида янги ўқув йилини бошлаш ва куз-қиш мавсумига тайёргарлик ҳолатини ўрганиш тўғрисида”ги масала муҳокама этилди.

Олий ва ўрта махсус таълим вазирининг 2020 йил 5 октябрдаги “Олий таълим муассасалари тасарруфидаги академик лицейларда 2020-2021 ўқув йилини анъанавий тарзда бошлаш тўғрисида”ги буйруғига асосан 15 октябрдан олий таълим муассасалари тасарруфидаги академик лицейларда 2020-2021 ўқув йили дарс жараёнларини анъанавий тарзда бошлаш белгиланган.

Бунда санитария меъёрлари (СанПин) талаблари бажарилган тақдирда ва ота-оналар ҳамда депутатлардан ижобий хулоса берилгандан сўнг академик лицейларда ўқув жараёнини бошлашга тайёрлиги ҳақида ҳудудий ишчи гуруҳларнинг хулосаси олиниши белгилаб қўйилган.

Самарқанд шаҳридаги академик лицейларда ўқувчиларнинг ота-оналари билан ўтказилган ижтимоий сўровлар натижаларига асосан 56,1 фоиз ота-оналар фарзандларининг академик лицейга келиб ўқишига, 43,9 фоизи эса онлайн таълимга хоҳиш билдирган.

Академик лицейлар пандемия шароитида ўқувчиларни қабул қилишга тайёрми? Бу борада берилган кўрсатмаларни тўлақонли амалга ошириш учун барча имкониятлар мавжудми? Лицейлар санитар-гигиеник талабларга жавоб берадими?

Жорий йилнинг 20-21 октябрь кунлари Самарқанд шаҳридаги олий таълим муассасалари таркибига кирувчи 7 та академик лицейларда мазкур саволларга жавоб изланди. Яъни, халқ депутатлари Самарқанд шаҳар Кенгашининг махсус ишчи гуруҳи лицейлардаги мавжуд аҳвол ҳамда янги ўқув йилига тайёргарлик ҳолатини ўрганди.

Деярли барча академик лицейлардаги гуруҳ хоналари, йўлаклар янги ўқув йилига тайёр, фақат Самарқанд тиббиёт институти тасарруфидаги академик лицейда капитал таъмирлаш ишлари давом этмоқда. Лицейнинг 3- қаватида таъмирлаш ишлари якунланган. Лекин 1- ва 2-қаватда таъмирлаш ишлари давом этмоқда.

Айни пайтда Самарқанд тиббиёт институти ва Самарқанд давлат архитектура-қурилиш институти қошидаги академик лицейнинг педагог кадрлари тиббий кўрикдан ўтмоқда. Самарқанд давлат университети, Самарқанд ветеринария медицинаси институти, Ал-Хоразмий номидаги Тошкент ахборот технологиялари университети Самарқанд филиали, Самарқанд иқтисодиёт ва сервис институти қошидаги академик лицейларнинг педагог ўқитувчилари 2021 йилнинг январь ойида тиббий кўрикдан ўтиши режалаштирилган.

Лицейларнинг педагог-ўқитувчилари коронавирусга қарши тест топширган. Натижаларга кўра, СамТИ академик лицейнинг 2 нафар техник ходимида, Самарқанд ветеринария медицинаси институти академик лицейининг 6 нафар ўқитувчи ва 2 нафар техник ходимларида, СамИСИ академик лицейининг 3 нафар ўқитувчи ва ҳамширасида, СамДЧТИ академик лицейининг 1 нафар ўқитувчисида мусбат натижа қайд этилган.

Барча лицейларда тиббиёт хоналари мавжуд. Лекин СамТИ академик лицейи тиббиёт ва изоляция хоналари таъмирталаб, Самарқанд давлат архитектура-қурилиш институти академик лицейи тиббиёт ва изоляция хоналари ўқув биносидан узоқда, яъни ётоқхонада жойлашган.

Академик лицейларда асосан 0,5 ёки 1 штат бирлигида ҳамшира ва 0,25 ёки 0,5 штат бирлигида умумий амалиёт шифокори бириктирилган. Демак, шифокор ҳафтанинг фақатгина маълум бир кунида ишлайдиган бўлса, ҳафтанинг қолган кунлари ва иккинчи навбатдаги ўқитувчи ва ўқувчиларнинг соғлиғига ким жавоб бериши мавҳум қолмоқда.

СамТИ академик лицейида на шифокор, на ҳамшира штати бор. Ваҳоланки, ўқитувчи ва ўқувчиларнинг саломатлигини доимий назоратга олиш, инфекция симптомлари сезилган вақтда дарҳол тегишли тадбирларни кўриш учун ҳам тиббиёт ходимлари зарур.

СамДЧТИ, СамТИ ва СамВМИ, СамДАҚИ академик лицейларида тана ҳароратини ўлчайдиган асбоблар ўқувчи сонига нисбатан етарли даражада таъминланмаган.

Бугунги кунда барча ўқитувчи-педагоглар, лицей ишчи-ходимлари иш жойида фаолият олиб боришларини ҳамда ташқаридан келадиган шахсларни инобатга олсак, оддий кўринган бу эҳтиёжнинг аҳамиятини мутасаддилар ҳисобга олмаган кўринади. Шунингдек, дезинфекция учун хлор, ҳар 2-3 соатда алмаштириб туриш учун бир марталик ниқоблар, антисептик воситалар керак.

Ўрганиш давомида барча академик лицейларнинг куз-қиш мавсумига тайёргарлик ҳолати ва санитар-гигиеник хоналарнинг аҳволи ўрганилди. Академик лицейлардаги ички санитар-гигиеник хоналар таъмирланган, керакли дезинфекцияловчи воситалар билан таъминланган. Фақатгина СамТИ қошидаги лицей биносининг 1-қаватдаги аёллар учун мўлжалланган бундай хона авария ҳолатида.

Ўрганилган академик лицейлардаги иссиқлик тизими, яъни қозонхоналар тартибга келтирилган, ишчи ҳолатида. Қайд этиш лозимки, СамТИ лицейи биносининг атрофи ўралмаган. Фикримизча, фақатгина видеокузатув мосламалари билан хавфсизликни назорат қилиш муаммо туғдиради.

Қайд қилинган муаммолар халқ депутатлари Самарқанд шаҳар Кенгашининг сессияси кун тартибига киритилиб, соҳа мутахассилари, мутасаддиларнинг фикр-мулоҳазалари тингланди. Қабул қилинган қарорда бажарилиши лозим бўлган ишлар юзасидан тегишли мутасаддиларга аниқ муддат белгиланди.

Муҳиба Бабабекова,

Халқ депутатлари Самарқанд шаҳар

кенгаши депутати, ишчи гуруҳ раҳбари

Улашинг!

Билдирилган фикрлар

Barno Bobobekova

2020-11-08 17:54:09

Hammamizga ma’lumki, 2020-2021-o’quv yili pandemiya sababli har yilgidan murakkab sharoitda boshlandi. Pandemiyaning noilmiy va ilmiy ishlab chiqarishga, bir so’z bilan aytganda, jamiyatning barcha jabhalariga salbiy ta’siri bois an’anaviy shaklga qaytish, shu jumladan, ta’lim jarayonida ham an’anaviy shaklga qaytish yuzasidan hukumatimiz qator chora va tadbirlarni ishlab chiqmoqda. Ajdodlarimizning “Beshikdan to qabrgacha ilm izla” degan ibratli hikmatini amaliyotga tatbiq etishga harakat qilayotgan pedagoglarimiz hozirgi qiyin vaziyatga qaramay sifatli an’anaviy ta’lim jarayonini tashkil etishmoqda. Oliy va o’rta maxsus vazirligining 2020-yil 5-oktabrdagi “Oliy ta’lim muassasalari tasarrufidagi akademik litseylarda 2020-2021-o’quv yilini an’anaviy tarzda boshlash to’g’risida”gi 518-sonli buyrug’i va shu asosida 2020- yil 20-oktabrda Samarqand shahar Xalq deputatlari kengashi va tegishli mutasaddi tashkilot a’zolaridan tashkil topgan ishchi guruh tomonidan SamDTI akademik litseyida 2020-2021-o’quv yili an’anaviy tarzda boshlashni tashkil etish maqsadida nazorat tekshiruvi o’tkazilganligi, asosiysi, ota - onalar o’rtasida dars jarayonlarini boshlash maqsadida o’tkazilgan so‘rovnoma natijalari SamDTI akademik litseyida an’anaviy ta’lim jarayonini boshlash uchun huquqiy asos bo’ldi. Tekshiruv natijasiga ko’ra akademik litsey o’quvchilarining umumiy muhakamalarda314 nafar ota-onalaridan ijtimoiy so’rovnomalar o’tkazilganligi, ushbu so’rovnoma natijasiga asosan farzandini an’anaviy ta’lim olish uchun yuborishga tayyor ota - onalar 229 nafar (72,9 %) ni tashkil etgan bo’lsa, 86 nafar (27,4 %) ota-ona farzandini onlayn ta’lim tizimida o’qitishni ma’qul ko’rganligini hisobga olgan holda akademik litseyda o’quv mashg’ulotlari 26-oktabrdan an’anaviy tarzda boshlandi. Shuni alohida ta’kidlash lozimki, epidemiyaning zararli oqibatlarini oldini olish maqsadida akademik litseyda ham qator choralar ko’rildi. Birinchi navbatda, ta’lim shaklini ixtiyoriy tanlash imkoniyati yaratilib, an’anaviy darslar bilan birgalikda onlayn darslar ham yo’lga qo’yildi. Akademik litseyda barcha o’quv xonalari va ijtimoiy masofani saqlashga mo’ljallangan shaxmat tartibdagi o’rinlar, hamda maxsus yo’laklar tayyor holatga keltirildi. 2020 - yil 15-oktabr kuni maqsadli ravishda akademik litseyning barcha ishchi xodimlari Covid-19 uchun test topshirdi. Ta’lim muassasasiga kiruvchilar antiseptik vositalar hamda bir martalik tibbiy niqob bilan ta’minlanmoqda. Kirish eshiklari bitta bo’lganligi sababli dastlab bitta, so‘ngra ijtimoiy masofani yanada kengroq saqlash zaruriyatidan kelib chiqib yana ikkita orqa yo’nalish eshiklari ochilgach, yetarli darajadagi harorat o‘lchagichlar bilan Samarqand davlat Tibbiyot Instituti tomonidan ta’minlandi. Dars jarayonida tibbiy qoidalarga rioya qilinishi, ya’ni tibbiy niqoblardan foydalanish, antiseptik vositalardan foydalanish, ijtimoiy masofani saqlash kabi holatlarni nazorat qilish maqsadida bino piremetri bo’ylab kuzatuv kameralari bilan jihozlangan. Kirish eshiklari oldida harorat o‘lchanishidan tashqari muassasa hamshirasi dars vaqtida o‘quv xonalarini tekshirib, o‘quvchilar bilan qisqa tushuntirish ishlarini olib borish yo’lga qo’yildi. SamDTI akademik litseyi ota-onalar bilan o’tkazgan so‘rovnomasida ota-onalar tomonidan berilgan takliflarni inobatga olib ixtiyoriy an’anaviy dars jarayonlariga qaytdi. Onlayn ta’lim tizimini tanlagan o‘quvchilar uchun sharoit yaratish maqsadida telegram ijtimoiy tarmog’i va Moodle tizimida darslar yo’lga qo’yildi.SSVga hat bilan murojat qilindi, vazirlik tomonidan mablag‘ ajratildi, litsey oldi tarafini orab olish ishlari boshlanib yuborildi, hojatxonalarda esa tamirlash ishlari tugatildi,hamshira honasi ham ta'mirdan chiqarildi. Samarqand shaxar tibbiyot birlashmasiga tibbiyot hodimlarini ajratishga xat bilan murojaat qilindi, xozirgi kunda mazkur murojaatimizga javobni kutilmoqda. Asosiy ta`lim jarayonlari akademik litseyda pedagoglarimiz tomonidan pandemiya davrida belgilangan karatin qoidalariga rioya qilgan xolatda davom ettirilmoqda. Fikrimizcha, hozirgi sharoitda pandemiyaning zararli oqibatlarini oldini olish, o’qituvchi va talabalarni sog’ligini saqlash maqsadida ularni gripp va pnevmoniyaga qarshi emlash jarayoniga jiddiy e’tibor berish zarur. SamDTI akademik litsey ma'muriyati

Фикрингизни қолдиринг

Фаол ёшлар

Шарофова Мехржон Шукур кизи

Партия фаоллари

Камолова Мубина Бахшуллаевна

Календарь