Мақсадга эришиш сири нимада?

Яқин ўтмишда ҳеч қандай ҳодиса коронавирус пандемиясичалик бутун дунёни остун-устун қилиб ташламаган эди. Мазкур касаллик бой, тиббиёти ривожланган, дунёда ҳукмроyлик учун курашаётган мамлакатларни ҳам ожиз ҳолга тушириб қўйди. Кўрдикки, маблағ, куч-қудрат енга олмаётган балони инсоний қадриятлар, оддий гигиена қоидаларига амал қилиш, ўзини ва бошқаларни ҳурмат қилиш орқали мағлуб этиш мумкин экан.

Афсуски, биз буни ҳали тўлиқ англаб етганимиз йўқ. Бу бўйича жорий йилнинг 3 апрель куни Президентимиз ўзбек халқига яна бир бор мурожаат билан чиқди. Шавкат Мирзиёев инқирозга қарши курашиш, касалланганларни даволаш, аҳолини, тадбиркорликни қўллаб-қувватлаш бўйича ҳукумат томонидан барча чоралар кўрилаётганини, аммо бунинг ўзи билан мақсадга эришиб бўлмаслигини таъкидлади.

Бунинг учун касалликка қарши ҳукумат, шифокорлар ёки ҳуқуқни муҳофаза қилувчи органлар эмас, ҳамма бир бўлиб ва ўз ўрнида ҳар биримиз курашишимиз лозим. Бунда барчамиз фаоллик кўрсатмас эканмиз? касалликни бартараф этиб бўлмайди. Айни синовли кунларда лоқайд ёки бепарво одамнинг биттаси ҳам вазиятни оғир аҳволга олиб келиши мумкин. Аммо ҳанузгача орамизда буни англаб етмаганлар миқдори керагидан анча кўпни ташкил қилмоқда. Кечагина оммавий ахборот воситаларида карантин эълон қилингандан буён 30 мингга яқин қоидабузарликка йўл қўйилгани, 330 киши карантин ҳудудини тарк этгани, оммавий тадбирлар тақиқланганига қарамай 24 та ҳолатда турли маросимлар ўтказилгани қайд этилди. Шундай пайтда ҳайрон қоласан киши, бу одамлар ўзининг, яқинларининг, бутун халқимизнинг соғлиғини хавф остига қўйишга, миллат тақдирига била туриб даҳл қилишга нима ҳақи бор? Давлат бюджетидан, турли жамғармалардан, ҳомийлар ҳисобидан миллирдлаб маблағлар шу офатни бартараф этишга сарфланаётган айни шароитда уларнинг кўр-кўрона манманлиги ёки ўз менини ҳар нарсадан устун қўйиб бу кассалликни кўпайтиришга уринишлари халққа, давлатга хиёнатдан бошқа нарса эмас.

Ахир, энг ўйинқорақ, эрта-ю кеч кўчадан бери келмайдиган кичкина болажонларимиз вазиятни тўғри тушуниб, “Кўчага чиқманглар, қўлимизни тез-тез ювиб туринглар, бўлмаса касал бўлиб қоласизлар” деб турган бир пайтда кўпни кўрган катта ёшлиларнинг бундай ишларни қилиб ўтиришини ҳеч нарса билан оқлаб бўлмайди. 

Мазкур касаллик ва у юзага келтирган вазият жамиятимизнинг асл юзини очиб ташлади, кўпчилигимизга ойна тутди. Афсуски, ойнадан кўринган манзара биз ўйлаганимиздан анча хунукроқ бўлиб чиқди. Кечагина машина ёки бензин нархини бир неча фоизга оширганларни виждонсиз, халқ душмани деяётган такси ҳайдовчилари бир неча соат ичида нарҳларни 3-4 баробарга ошириб олди. Ёки бўлмаса, солиқчилар ёки бошқа назорат қилувчи органларни юлғичликда айблаётган айрим тадбиркорлар ҳам талаб ортган зарурий воситаларини икки баравар қимматига сота бошлади, кечагина шифокорни дўппослаганларни олқишлаб улар шунга муносиб дея бонг  ураётганлар, ўз тусларини ўзгартириб шифокорларни қаҳрамон дея ҳамд- санолар айтмоқда.

Яхшиямки, жамиятимиз фақат шундайлардан иборат эмас экан. Йўловчиларни текинга етказиб қўядиганлар, қарияларга бозорлик қилиб берувчилар, тегишли жамғармаларга катта миқдордаги маблағ ўтказиб берувчилар, зарурий маҳсулотларни текинга тарқатувчилар ҳам кўпчиликни ташкил қилмоқда. Ана шу каби инсонлар саъй-ҳаракати билан маълум муддат ўзини йўқотиб қўйган инсонларимиз ҳовури босилди. Ойна фақат ёмон манзараларни кўрсатмади. Аммо бундай фидойиларнинг ташаббускорлигининг ўзи камлик қилади.

Бешта бармоқ бирлашиб бир мушт бўлмас экан ,коранавирусга қарши берилган ҳар қандай зарба бесамар кетаверади. Келинг, азиз ватандошим, ўзлигимизни унутмайлик. Бу кунлар ўтади-кетади. Аммо қийин даврларда вазиятдан фойдланишга уринганимиз ҳеч кимнинг ёдидан чиқмайди. Шундай экан, ўзимизни эмас, халқимизни, бугунимизни эмас, эртамизни ўйлаб яшайлик. Сабрли бўлиб, уйда қолайлик.

Дилрабо ХОЛБОЕВА,
Олий Мажлис Қонунчилик палатаси депутати,

“Адолат” СДП фракцияси аъзоси