Матбуот котиблари фаолиятини янада такомиллаштириш бўйича семинар-тренинг ташкил этилди

Бугун Ўзбекистон «Адолат» СДП Марказий аппарати биноси мажлислар залида, «Матбуот котиблари фаолиятини янада такомиллаштиришнинг долзарб масалалари» мавзусида ўқув семинар ташкил этилди.

Тадбирни Ўзбекистон «Адолат» СДП Сиёсий Кенгаши раиси ўринбосари Абдукамол Шодиевич кириш сўзи билан очиб, матбуот котиблари ҳар қандай ташкилотнинг жон томири эканлиги, янгидан-янги ислоҳотлар, эришилаётган ютуқлар, йўл қўйилаётган хатолар, пировард натижада эса шу ташкилот томонидан амалга оширилаётган ютуқ ва камчиликлар билан кенг жамоатчиликни яқиндан таништириш, мазкур ташкилот борасидаги ижобий ва кези келганда ҳаттоки салбий фикрларни ҳам шакллантириб қўйиш кўп жиҳатдан ташкилотда фаолият юритаётган матбуот котибларига боғлиқ эканлигини алоҳида таъкидлаб ўтди.

Шунингдек, тадбир давомида «Ўзбекистон журналистика ва оммавий коммуникациялар университети” докторанти Мастура Ҳайитованинг матбуот котибларининг «Пиарменлик фаолияти» борасида қилган маърузаси йиғилганларда катта қизиқиш уйғотди.

Мунозара, савол-жавоблар тарзида ўтган мазкур семинар давомида, тадбир қатнашчилари ва зоом орқали онлайн тарзда иштирок этаётган ҳудудий Кенгаш матбуот котибларининг ташаббуслари, таклиф ва мулоҳазалари эшитилди. Мазкур ўқув машғулоти давомида наъмунали фаолият олиб бораётган матбуот котибларини алоҳида эътироф этиш билан бир қаторда, аниқланган камчиликлар муҳокама этилиб, келгусида амалга оширилиши режалаштирилаётган ишлар борасида келишиб олинди.

“Адолат” СДП

Матбуот хизмати