Меҳр ва саховат йўлидаги ҳамкорлик

24 май санасида "Адолат" СДП Марказий аппарати Тошкент шаҳар ИИББ ЙҲХБ билан ҳамкорликда Тошкент шаҳар Олмазор туманида жойлашган 106- сонли заиф эшитувчи болалар учун ихтисослаштирилган мактаб-интернатда 1июнь- Ҳалқаро болаларни ҳимоя қилиш куни муносабати “Бор меҳримиз сенга болажон!” шиори остидаги байрам тадбири ва Тошкент шаҳри бўйлаб автобусларда саёҳат ташкил этилди.

Тадбирда "Адолат" СДП Сиёсий Кенгаши раиси Баҳром Абдуҳалимов, Сиёсий Кенгаш раиси ўринбосари Умиджон Сулаймонов, Марказий аппарат жамоаси, Тошкент шаҳар ИИББ ЙҲХБ бошлиғи полковник Рафиқжон Жалилов бошчилигидаги масъул ходимлари, ОАВ ходимлари, мактаб-интернат ўқитувчилари жамоаси ва албатта мактаб тарбияланувчилари иштирок этдилар.
Учрашув бошида Тошкент бўйлаб саёҳатга чиқиш олдидан болажонлар устозлари, сурдопедагог Муниса Кадирова раҳбарлигида байрам концерти намойиш этишди.

Партия ходимлари ва тадбирнинг бошқа иштирокчилари заиф эшитувчи, гапиришга қийналадиган болажонларнинг ҳар бир куй ва қўшиққа жўр бўлиб, уни ижро этишларини ҳаяжон ва кўз ёшлари билан кузатдилар.
Уларнинг ҳаётга, яшашга бўлган чанқоқликлар, бир-бирларига меҳрибонликлари, меҳмонларга ҳурмат, ҳайрат билан боқишларини кўриб меҳри жўш уриб кетган партия ходимларни болаларни етаклаб автобусларга чиқдилар.
Тадбир давомида болаларнинг вақтларини мазмунли ташкил этиш ва йўл ҳаракати хавфсизлиги қоидалари билан яқиндан таништириш мақсадида, Яшнабод туманида жойлашган "Уч авлод" боғида полковник Жалилов Рафиқжон Қўлдошевич бошчилигида ЙҲХХ ходимлари болажонлар учун махсус ўқув машғулотлари ўтказилди. Ўқув машғулотларида болажонларнинг ўзлари тенгдошлари учун йўл кузатувчиси сифатида йўл кўрсатиб турдилар. Катта қизиқиш билан йўл ҳаракати қоидаларини ўрганишга, амалда кўрсатиб беришга ҳаракат қилдилар.

Машғулотдан сўнг, болалар қалбига янада кўпроқ қувонч улашиш истагида тадбир ташкилотчилари “Анҳор-локомотив” маданият ва истироҳат боғига ҳам сайр уюштиришди. Боғдаги аттрационларда мароқли хордиқ чиқарганларидан сўнг болажонлар байрам дастурхонига таклиф этилди. Дастурхон атрофида ўтирган барча тарбияланувчиларга партиянинг байрам совғалари тарқатилди.
Саёҳатдан мамнун қайтган болажонлар ўз мактаблари дарвозасидан ичкарига киришаркан, ташкилотчиларга барчаси биргаликда бир неча бор “РАҲМАТ! РАҲМАТ! РАҲМАТ” деб ҳайқиришди.

Уларнинг бундай кайфиятини, бахтдан кулиб турган чеҳраларини кўрган партия ва ЙҲХХ ходимлари бир-бирларини тадбирни ҳамжиҳатликда шундай чиройли ўтгани, кўзланган мақсад амалга ошгани билан табриклашди ва бундай кейинги тадбирларда ҳам анъанавий тарзда яна янги лойиҳаларни амалга оширишга келишиб олишди.

Бугунги ногиронлиги бор болажонларга бахт, қувонч улашишга бағишланган тадбиримиз биз партия ходимлари учун нафақат хизмат вазифамиз доирасида, балки ўзимизнинг ҳам инсоний меҳр-саховат кўрсатишимиз имконимиз борлигини юзага чиқариб берганлигидан мамнун бўлиб, кундалик фаолиятимизни давом эттиришга киришдик.