Меҳрни қалб кўзи билан кўрган қизалоқ

Беғараз донорлик акциясида биз билан танишиб, ўзининг қўшиқлари билан ҳаммани ром этган, “партиянинг тутинган қизи”га айланган бекободлик Асалхон Раҳмонова  “Адолат” билан  доимий алоқада. 

Байрам тадбирида фарзандлари билан бирга иштирок этган ходимларимизнинг баъзиларининг телефон рақамларини  онасидан ёзиб олишни илтимос қилган экан, болаларимиз, ходимларимиз билан гаплашиб, турли болаларча, лекин маъноси катталарча саволларни телефон орқали бериб, ўзи истаган жавобларни олиб келди.

Бугун, 10 июнь куни саккиз ёшни қаршилаган қизалоқ бир олам қувончга тўлди. Асалхон бу галги таваллуд айёми “Адолат” СДП марказий биносида ўзгача нишонланди.

Партия раҳбарияти таклифига асосан Бекобод шаҳридан ташриф буюрган Асалхон ва унинг онасини партия Сиёсий Кенгаши раиси ўринбосарлари, Марказий аппарат ходимлари, партия фаоллари илиқ кутиб олдилар.

“Адолат”  ўзининг “тутинган қизи”га унинг орзуси рўёбига айланган чиройли кўйлак, у доим ёнида олиб юрадиган микрофони учун кўйлагига мос  сумкача ва бошқа турли-туман эсдалик совғаларини тантанали равишда топширди.

- Қизимнинг бугунги  оламларга сиғмас хурсандчилигини соғайиши учун қўшилган жуда катта ҳисса деб биламан. Бизга шодлик улашган “Адолат” партиясидан чексиз миннатдорман – деди фарзандининг қувончидан кўзлари намланган  онаи зор.

Асалхон ўзини қучоқлаб, табриклаб, энг самимий тилакларини билдираётган партия ходимларига сезги кўзлари билан қараркан, партия фаолларидан бирининг қулоғига секингина: - “Мен ҳам партияда ишласам бўладими?”-деди ийманибгина.

“Нима учун партияда ишламоқчисан?”-деб берилган саволга у :- “Агар партияда ишласам, мен ҳам албатта одамларга яхшилик қиламан”- деди бошини ғоз тутиб.

Бу мулоқотни эшитиб турган партия раҳбарияти вакиллари: -“Рахмонова Асалхон, сиз 1 июндан бери партияда ишлаяпсиз, унинг энг кичкина аъзосисиз”—дейишганда, у хурсандчилигидан ичига сиғмай, “ҳозир уйга қайтай, ҳаммага мен “Адолат”да ишлайман деб айтаман!”- деди.

Бу дунёни жуфт кўзлар эмас, қалб ила ҳис қиладиган инсонлар балки ҳаёт ҳақиқатларию мўъжизаларини соғломлардан-да теранроқ англарлар, эҳтимол.

Асалхон ҳам унга кўрсатилаётган эҳтиромни ўз кўзи билан кўриб, гувоҳ бўлолмагани билан, онгида меҳрнинг расмини чиза олади,  у кўнглига шодлик тасаввурини муҳрлай олишга қодир.

Биз, сен билан биргамиз, сен доим меҳримиз қуршовидасан, Асалхон!