“Мурувват” уйига мурувват кўрсатилди

Меҳр-саховат халқимизга хос фазилатларидан бири ҳисобланади. Айни оғир дамларда ҳам ана шу қадриятларимиз давлат сиёсати даражасига кўтарилди.

Ҳеч ким меҳр ва эътибордан четда қолмаслигини истаган Қорақалпоғистон Республикасидаги «Адолат» социал-демократик партияси фаоллари ҳам савобли ишларга ўз хиссаларини қўшиб келмоқда. Шу каби хайрли ишларни қўллаб-қувватлаётган тадбиркорларнинг сони эса кундан-кунга ошиб бораётгани қувонарлидир.

Жумладан, партия Кегейли тумани Кенгаши туманида тадбиркорлик фаолияти билан шуғилланаётган "БийБатыр Аскаров" МЧЖ раҳбари, партиямизнинг фаол аъзоси Асқаров Султан ҳомийлигида Чимбой “Мурувват” ногиронлиги бўлган шахслар учун эркаклар интернат уйида халқимизга хос меҳр-муравват, хайр-саховат тадбирини амалга оширди.

Мақсад, меҳр ва мурувватга ташна қалб эгаларини маънавий ва моддий қўллаб-қувватлаш, уларнинг ҳолидан хабар олиш, эҳтиром билдириш, кўнглини кўтариш.

Мазкур тадбир доирасида “Мурувват” уйидаги жами 238 нафар ёлғиз қариялар ва даволанувчилар учун 3 миллион сўмлик байрам дастурхони ёзилиб, ҳомийлик ёрдами кўрсатилди.

Айтиш жоизки, ҳомийлик қилган Асқаров Султан узоқ йиллар тадбиркорлик билан шуғулланиб қанчадан қанча инсонларга ёрдам қўлини чўзган. Асосан унинг ушбу хайрли ишлари пандемия вақтида халқимизга хос бўлган бағрикенглик, юксак инсоний фазилатлари яна бир бора намоён бўлмоқда.

“Мурувват” уйида яшовчи кекса ёшдагилар, кўрсатилаётган бундай ғамҳўрлик учун тадбир ташкилотчиларига алоҳида ўз миннатдорчиликларини билдириб, дуога қўл очди. Бундан ташқари ташкилотчиларга ушбу “Мурувват” уйи директори номидан миннатдорчилик хати ҳам берилди.

Ўзбекистон “Адолат” СДП ўз дастурида ижтимоий ҳимоя масаласига устувор вазифа сифатида қарайди. Умуман олганда партиямиз фаоллари аждодларимиздан мерос бўлиб келаётган меҳр-мурувват, меҳр-шафқат, сахийлик-саховатпешалик фазилатларининг халқимиз орасида доимий одат тусига айланиши учун интилади.

Генжебай КАИПОВ,

Ўзбекистон «Адолат» СДП

Кегейли тумани Кенгаши раиси