Номзод хоразмлик сайловчилар билан учрашди

30 сентябрь куни Хоразм вилоят ҳокимлиги Кенгашлар уйида Ўзбекистон Республикаси Президентлигига  “Адолат” социал-демократик партиясидан кўрсатилган номзод  Баҳром Абдуҳалимов Абдураҳимовичнинг  хоразмлик сайловчилар билан учрашуви бўлиб ўтди.

Учрашувда партия фаоллари, депутатлари, хайрихоҳлар, ҳамкор ташкилотлар вакиллари, меҳнат фахрийлари,  ёшлар,  фаол хотин-қизлар ҳамда оммавий ахборот воситалари вакиллари, журналист ва блогерлар иштирок этишди.

Учрашувни  номзоднинг Хоразмдаги ишончли вакили, Хоразм Маъмун академияси профессори Абдуллаев Икрам Искандарович кириш сўзи билан очиб берди.

Учрашув даставвалида ишончли вакил номзоднинг  таржимаи ҳоли ва фаолияти  тўғрисида атрофлича маълумот берди.

 Шундан сўнг номзод  Баҳром Абдуҳалимов сўзга чиқиб, ўз сайловолди дастурида илгари сурилган  илғор ғоялар, асосий масалаларни  сайловчилар эътиборига ҳавола қилди.

Жумладан,  халқ депутатлари маҳаллий Кенгашларнинг ролини кучайтириш орқали ижро ҳокимиятини устидан депутатлик ва жамоатчилик назоратини ўрнатиш, барча даражадаги давлат ҳокимияти ва бошқаруви органларига ватанпарвар, профессионал ва фидойи инсонлар келишини таъминлаш, жиноятчиликка, порахўрликка, таъмагирликка, зўравонликка қарши муросасиз курашиш, прокуратура, адлия органлари ва суд ходимлари ўртасидаги ижтимоий тенгсизликни тугатиш, адолатли  ва мустақил суд-ҳуқуқ тизимини яратиш ишларини давом эттириш, судни том маънода адолат қўрғонига айлантириш каби асосий масалалар иштирокчилар диққат марказидан жой олди.

Фикр ва мулоҳазаларга,  таклиф ва тавсияларга  бой бўлган  учрашув сўнгида  номзод Баҳром Абдуҳалимов сайловчиларнинг қизиқтирган саволларига атрофлича, ҳаётий мисоллар билан асосли жавоблар берди.

Номзоднинг сайловолди дастури сайловчилар томонидан  қўллаб-қувватланди ва Ўзбекистон Республикаси Президентлигига кўрсатилган номзод Абдуҳалимов Баҳром Абдураҳимовичга овоз беришга чақирилди.

“Адолат” СДП Хоразм вилояти Кенгаши Матбуот хизмати