“Ораста қизлар” кўрик-танлови ғолиблари имтиёзли сертификатни қўлга киритди

Фарғона политехника институтида “Aдолат” СДП вилоят Кенгаши aёллар қаноти, институт механика-машинасозлик факультети талабалар Кенгаши, хотин-қизлар маслаҳат Кенгаши ҳамда Фарғона шаҳар “Ибратли бекам” ўқув маркази ҳамкорлигида “Ораста қизлар” кўрик-танлови ўтказилди.

Ўқувчи-қизларни оилавий ва мустақил ҳаётга тайёрлаш, талаба қизларнинг фаоллигини ошириш, улар ўртасида соғлом турмуш тарзини тарғиб қилиш, талаба-қизларнинг ҳуқуқий саводхонлигини юксалтириш орқали оила, давлат ва жамият қурилишидаги фаоллигини кучайтириш, қобилиятларини тўлиқ намоён этишларида танлов аҳамиятлидир.

Кўрик-танловда иштирокчилар “Таништирув”, “Савол-жавоб”, “Рўзғор сирлари”, “Эркин мавзу” каби шартлар бўйича ўзларининг иқтидорларини намоён этди.

Танлов натижаларига кўра, 1-ўринни Наврўзахон Ўринбоева, 2-ўринни Гулзиёхон Отахожаева, 3-ўринни Нозимахон Қобулжонова эгаллади. “Энг зукко қиз” номинациясига эса Мохигул Исмоилова муносиб топилди.

Ғолибларга ташкилочиларнинг диплом,  эсдалик совғалари ҳамда Фарғона шаҳар “Ибратли бекам” ўқув марказининг имтиёзли ўқув курсларида таҳсил олиш ҳуқуқини берувчи сертификатлари топширилди.

 Бунёд АҲМАДАЛИЕВ,

  “Адолат” СДП Фарғона вилоят Кенгаши қошидаги “Ёш адолатчилар” қаноти раиси