Ўз фаолиятингиздан қониқасизми?

«Адолат» социал-демократик партияси Андижон вилояти кенгашининг IX пленуми бўлиб ўтди. Унда партия фаоллари билан бирга маҳаллий кенгаш депутатлари ва ОАВ вакиллари иштирок этишди.

Дастлаб Давлатимиз раҳбарининг Олий Мажлис ва Ўзбекистон халқига Мурожаатномасига эътибор қаратилди. Унда кўрсатиб ўтилган долзарб вазифалардан келиб чиқиб, 2023 йилда амалга ошириладиган ишлар юзасидан чора-тадбир белгиланди. Жумладан, инсон қадрини улуғлаш, таълим сифатини ошириш, тиббиёт соҳасини ривожлантириш йўлидаги ислоҳотларда фаол иштирок этиш таъкидланди.

Шундан сўнг 2022 йилнинг ўтган давридаги партия фаолияти сарҳисоб қилинди. Албатта, эришилган натижалар қувонарли. Бу партия фаолларининг ўз вазифасига эътибор билан қарагани, зиммасига юклатилган вазифалар ижросини таъминлашга ижобий ёндашганини кўрсатади. Андижон, Избоскан, Улуғнор ва Жалақудуқ туман кенгашлари барча йўналишларда юқори натижага эришгани қайд этилди. Натижада мазкур ҳудудларда «Адолат» партиясини қўллаб-қувватловчилар сони ошиб бормоқда.

Айни вақтда камчиликлар ҳам йўқ эмас. Партиявий тадбирларни ташкил этиш, сафимизга янги аъзоларни қабул қилишда ҳамон сусткашликка йўл қўяётган ҳудудий кенгашлар фаолияти танқидий баҳоланди. Марҳамат, Булоқбоши ва Пахтаобод туман кенгашларининг раислари бундан хулоса қилиши лозимлиги айтиб ўтилди. Келгуси йилда фаолиятида ўзгариш қилмаган ҳудудий кенгаш раисларига нисбатан кескин чора кўрилиши белгиланди.

Малохатхон Мусаева, «Адолат» СДП Андижон вилояти кенгаши раиси ўринбосари:

- Президентимиз томонидан зиммамизга катта масъулият юклангани ҳар биримизни янада фаол бўлишга ундамоқда. Шундан келиб чиқиб, партия етакчилари олдига «Ўз фаолиятингиздан қониқасизми?», - дея савол қўйилди. Албатта, бунга ижобий жавоб бериш масъулият демакдир. Ишонаманки, 2023 йилда туман кенгашлари фаолиятида кескин ўзгариш қилинади.

Пленум ишида партия фаолиятини жонлантириш билан боғлиқ бошқа масалалар ҳам кўриб чиқилди.

«Адолат» СДП Андижон вилояти кенгаши Матбуот хизмати