Партия фаоллари – “Оқ кема” оромгоҳида

Жорий йилнинг 18 июнь куни Ўзбекистон “Адолат” СДП Қорақалпоғистон Республикаси Кенгаши ташаббуси билан Мўйноқ туманидаги “Оқ кема” болалар дам олиш ва соғломлаштириш оромгоҳида Ўзбекистон “Адолат” СДПнинг “Ватан келажаги ёшлар қўлида” лойиҳаси доирасида давлатимиз раҳбарининг Ёшлар маънавиятини юксалтириш ва уларнинг бўш вақтини мазмунли ташкил этиш бўйича беш ташаббусини қўллаб-қувватлаш мақсадида болалар ўртасида спортнинг стол тенниси, шахмат ва сувда сузиш турлари бўйича  мусобақалар ташкил этилди.

Тадбирни ўтказишдан асосий мақсад ёш иқтидорли спортчиларни аниқлаш ва жамиятимизда соғлом турмуш тарзини шакллантириш, айниқса ёш авлоднинг жисмоний тарбия  ва спортга бўлган қизиқишларини орттиришга қаратилганлиги билан аҳамиятли бўлди.

Ҳақиқатан ҳам болаларнинг ақлан соғлом бўлиб улғайишида шахмат алоҳида аҳамият касб этса, стол тенниси чаққонлик ва илдамликни тақозо этади.

Ёзнинг иссиқ кунларида сувда сузиш жонга ором бахш этади.

Мазкур оромгоҳда ташкил этилган ушбу спорт мусобақаларида юртимизнинг турли туманларидан келган мактаб ёшидаги болалар ўзаро беллашдилар. Оромгоҳда доимий ташкил этилган спорт тўгаракларида болалар ўзларини чиниқтириши ва турли хил спорт турлари билан шуғулланишлари учун барча шарт-шароитлар етарли даражада яратиб берилганлиги мусобақа жараёнида маълум бўлди.

Буларнинг барчаси, албатта, ёш авлоднинг эртанги келажаги  масаласи - давлат сиёсатининг энг устувор вазифаларидан бири эканлигидан далолат бериб, ўсиб келаётган навқирон авлоднинг ҳар томонлама етук, баркамол авлодлар бўлиб камол топишига хизмат қилади.

Ўтказилган мусобақалар якунида спортнинг шахмат тури бўйича Дастан Тореев, стол тенниси бўйича Шерзод Буронбаев, сувда сузиш бўйича Жамаладдин Зухраддиновлар ғолибликни қўлга киритди. Шунингдек, Эркин Тореев, Асқар Наўризбаев шахмат бўйича, Атабек Қудияров, Азизбек Жаңабаев стол тенниси бўйича, Худайберген Рустамов ва Имронбек Калбаевлар сувда сузиш бўйича иккинчи ва учинчи ўринларга муносиб деб топилди.

Ғолибларни партия Қорақалпоғистон Республикаси Кенгаш раиси Нурлыбай Қаипбергенов табриклади ва болажонлар учун партия Республика Кенгаши  томонидан тайёрланган диплом ва қимматбаҳо совғаларни топширди.

Партия фаолларининг оромгоҳга қилган бир кунлик ташрифи давомида ташкил этилган спорт мусобақалари қизиқарли лаҳзаларга бой бўлди.

Бахадыр ЖУЗБАЕВ,

Ўзбекистон “Адолат” СДП

Қорақалпоғистон Республикаси

Кенгаши Матбуот котиби