Партия фаолларининг ёшлар билан мулоқотлари ташкил этилди

Куни кеча Ўзбекистон “Адолат” СДП Янгиариқ туман Кенгаши раиси Барногул Абдуллаева ҳамда туман Кенгаши депутати Шавкат Худайберганов ҳамкорликда ёшлар орасида бўлиб, улар билан  очиқ мулоқотлар ташкил этишди.

Учрашув аввалида,  фаоллар тумандаги 19 ва 33- сон умум ўрта таълим мактабларининг юқори синф ўқувчилари билан  дилдан суҳбатлашилди.

Қизғин тус олган мулоқотда мамлакатимизда олиб борилаётган ислоҳотлар негизида ўсиб келаётган ёшлар тақдири мужассамлиги,  шу боис юрт  корига ярайдиган инсонлар бўлиб шаклланиш, устувор мақсадлар сари дадил бориш ҳар бир ёшнинг  Ватанимиз олдидаги муқаддас бурчи экани тўғрисида сўз юритилди.

Ўқувчиларнинг  ёниқ юрак билан, олдига қўйган мақсадлари, орзулари тўғрисидаги қалб сўзлари фаолларнинг диққатини тортди. Фаоллар ёшларга ҳаётий мисоллар билан маслаҳат ва тавсиялар бериш орқали ишонч ҳамда шижоат  бағишлашди.

Шундан сўнг, партия фаоллари  иқтидорли ўқувчилар томонидан тайёрланган қўл меҳнатлари билан таниши учун кўргазмага ташриф буюришди. Турли шаклдаги жозибадор миллий кийимлар, рўзғор буюмлари ва бошқа қўл меҳнатлар иштирокчиларда катта таассурот қолдирди. Фаоллар томонидан  иқтидорли ўқувчиларнинг  қўл ишлари эътироф этилди.

Мулоқот “Пўрсанг” маҳалласида яшовчи ёшлар билан табиат қўйнида давом этди. Унда депутат Шавкат Худайберганов ёшларни маҳаллани  тоза, саранжом-саришта сақлаш ишларига  бош-қош, ташаббускор бўлишга ундади.

Шунингдек, уларни  ўйлантираётган бандлик, тадбиркорликка бўлган хоҳиш-истаклари эътиборга олинди ва ёрдам бериш чора-тадбирлари бошлаб юборилди.

Маҳалла ёшлари билан бирга маҳалла ҳудудида жойлашган “Зайниддин Эшон  бува” қабристони  атрофларини ободонлаштириш ишлари ҳам эътибордан четда қолмади.

Фаолларнинг ёшлар билан учрашувлари давом этмоқда.

                                                                                                          Замира АБДУЛЛАЕВА,

                                                                                                       Ўзбекистон “Адолат” СДП

                                                                                 Хоразм вилоят Кенгаши матбуот котиби