Саховат кўрсатганлар тақдирланди

Жамиятда тинчлик-осойишталик, дўстлик ва тотувлик муҳитини мустаҳкамлашда фаол иштирок этаётган соғлиқни сақлаш соҳасининг жонкуяр вакиллари, саховатли тадбиркорлар, давлат ва жамоат ташкилотларининг фидойи ходимлари ва бир қатор ташаббускор, фаол фуқароларни “Меҳр-саховат” кўкрак нишони билан мукофотлаш ҳақида ҳукуматимизнинг Қарори қабул қилинди.

  Қувонарлиси, тақдирланганлар орасида Фарғона вилоятиннг Фарғона туманидан 17 нафар соғлиқни сақлаш соҳасининг жонкуяр вакиллари, саховатли тадбиркорлар, давлат ташкилотлари ва жамоат бирлашмаларининг фидойи ходимлари ҳамда бошқа ташаббускор ва фаол фуқаролари борлигидир.

  “Меҳр-саховат” кўкрак нишонларини ўз эгаларига топшириш муносабати билан Фарғона туман ҳокимлигида тадбир ўтказилиб, туманимизнинг фаол депутатлари ва мутасадди ташкилот раҳбарлари иштирок этдилар. Фарғона туман Кенгаши депутати Н.Исақов сўзга чиқиб, фидокор соҳа вакилларини табриклаб, келгусидаги ишларига омад ва зафарлар тилади.

- Президентимизнинг озгина меҳнатимизни қадрлаб бизларга билдирган ишончига муносиб бўлишга ҳаракат қиламиз, – дейди туман тиббиёт бирлашмаси раҳбар ўринбосари У.Эралиев. – Туман аҳолисининг салматлигини асраш,  болалар ва кексаларга ғамхўрлик қилиб, янада шижоат билан ҳаракат қиламиз.

Тадбир сўнгида туман ҳокими Шухратжон Мўминов сўз олиб, юксак эҳтиром билан мукофотнинг илк эгаларини табриклаб, юртимизда фидокорлик, шижоат ҳар доим қадрланишини ва муносиб тақдирланишини таъкидлаб ўтди.

Озодахон ДАДАЖОНОВА,

Халқ депутатлари Фарғона туман

Кенгаши депутати