Саховатли депутатлар

Сайловчи ўзи овоз берган депутатига доимо ишонч билан қарайди.  Муаммоларга дуч келганда ёки моддий таъминот туфайли қийналиб қолганида ундан ёрдам сўрайди. Айтиш мумкинки, бугунги  кунда депутат чин маънода аҳолининг яқин кўмакчисига айланмоқда.

Халқ депутатлари Сўх туман Кенгаши депутати Субҳонали Нишонов   ташаббуси билан партиянинг “Саховат– беназир қадрият” лойиҳаси доирасида “Сарибозорча”, “Сариканда”, “Мулгон” ва “Ҳазрати Али” МФЙда яшовчи 30 нафар ижтимоий таъминотга муҳтож оилаларга ёғ ва гўшт маҳсулоти етказиб берилиб, уларнинг ҳолидан хабар олинди.

Халқ депутатлари Фарғона туман Кенгаши депутати Отабек Холиқов эса  тумандаги “Юксалиш” МФЙда истиқомат қилувчи Ўғилой Жумаева хонадонида ичимлик суви бўйича муаммо борлигини билгач зарур ёрдамни кўрсатди.

Депутат  ўз ҳисобидан 40 метр масофадан ичимлик суви  тармоғи тортиб берилишини таъминлади. Хонадонга ичимлик суви келгач онахоннинг қувончдан юзлари ёришди, қўллари дуога очилди. 

­­­­­­­­­­­­­­­­­­­-­­­­­­­­­­­­­­­­ Ҳар куни кўчадан сув ташиб келардим, – дейди онахон. –   Бу юмуш  гоҳида мени жуда толиқтирарди.  Энди обиҳаётнинг ўзи хонадонимга кириб келди.  “Сув келтирган элда азиз” дейдилар. Мен учун  депутатимиз жуда савобли ишга қўл урдилар.

Партиянинг "Муаммо билан юзма – юз"  лойиҳаси доирасида халқ депутатлари Қўқон шаҳар Кенгаши депутати Жаҳонгир Усмонов томонидан ҳудуддаги “Наврўз” МФЙда яшовчи фуқаро Адинахон Мелибаеванинг мурожаати ўрганилди.

 А.Мелибоева кам таъминланган, бир неча йиллардан буён боқувчисини йўқотган, ёлғиз ўзи истиқомат қилиб келади. Фуқаронинг хонадонида газ таъминотидан қарздорлиги кўпайиб кетганлиги сабабли тармоқдан вақтинча узиб қўйилган. Депутат хонадонда бўлиб, мурожаатчи билан суҳбатлашиб,  ҳолатни тўғри англади. Қарздорлиги бартараф этилиб, совуқ кунларда хонадонда иссиқлик манбаининг бўлиши таъминланди.  Ҳудуддаги ҳомийлар ҳамкорлигида фуқарога бир неча турдаги озиқ-овқат маҳсулотлари етказиб берилди.

“Адолат” СДП Фарғона вилоят Кенгаши

   Матбуот хизмати