ШУ БУЮК МИЛЛАТНИНГ КЕЛАЖАГИСИЗ!

Азиз болажонлар!

Сўзимнинг аввалида барчангизни бугунги қувончли тантана – 1 июнь – Халқаро болаларни ҳимоя қилиш куни билан чин қалбимдан  муборакбод  этаман!

Ҳеч шубҳа йўқки, сизларнинг барчангиз жонажон Ватанимизнинг бебаҳо бойлиги, буюк келажак ворисларисиз.
Маълумки, бугун мамлакатимизда сизнинг  жисмонан бақувват ва соғлом бўлиб ўсишингиз, билимдон ва зукко авлод сифатида камолга етишингиз учун улкан ишлар қилинмоқда.

Сиз таълим олаётган боғча ёки мактаблар капитал таъмирланиб, ўқиш ва ўрганишингиз учун зарур бўлган шарт-шароитлар яратиб берилишига жиддий эътибор берилаётир.  Шунингдек, спорт  билан шуғулланишингиз учун спорт майдончалари, сув ҳавзалари барпо этилмоқда. Буларнинг барчаси сиз ва тенгдошларингиз учун, албатта.

Қолаверса,  сизнинг беғубор ва тоза дунёнгиз, гулгун чеҳрангизда балққан табассум  биз, катталарнинг ҳаётини мазмунли ва ёрқин бўлишида муҳим аҳамият касб этади.
Барчангиз камолот пиллапоясига етганда, посбонлар, шифокорлар, ўқитувчилар, жаҳон чемпионлари,  суд-ҳуқуқ  органларининг ишончли вакили сифатида юртимиз тараққиётига ўз ҳиссангизни қўшишингиз аниқ.

Бу йўлда биз, «Адолатчи»лар ҳам сизнинг ҳуқуқ ва манфаатларингизни ҳимоя қилишга, бахтли болалик завқини ҳис қилиб улғайишингизга, доимий эътибор ва ғамхўрликлар қуршовида бўлишингизга бор куч-ғайратимизни сафарбар этамиз.

Байрамингиз муборак бўлсин, азиз болажонлар!

Робахон МАХМУДОВА,
Сиёсий Кенгаш раиси