Спорт зали йўқ мактаб

Ўзбекистон “Адолат”  СДП  Бухоро вилоят Кенгаши томонидан вилоят миқёсида  умумтаълим мактабларида ўрганишлар олиб борилди. Жумладан, партиянинг Шофиркон  туман кенгаши томонидан тумандаги 20-33 мактаблар раҳбарларининг фаолияти ҳамда мактаб шарт-шароитлари ўрганилди. Даставвал, Ўзбекистон “Адолат” СДП  Шофиркон туман Кенгаши  ва депутатлик гуруҳи томонидан илгари сурилган ушбу тарғибот ва ўрганиш ишлари учун бир неча ташкилотлар жалб қилинди. Яъни “Ижтимоий-маданий ривожланиш”, “Қонунийликни таъминлаш ва коррупцияга қарши курашиш”, “Ёшлар сиёсати ва соғлом авлодни тарбиялаш” масалалари доимий комиссия раислари ва аъзолари, халқ таълими бўлими, ва туман санитария эпидимиологик осойишталик ва жамоа саломатлик бўлими ходимларидан иборат ишчи гуруҳ ташкил этилди.

Ишчи гуруҳнинг илк манзили 33 умумий ўрта таълим мактаби бўлди.  Ушбу мактаб  “Қуйи Чуқурак” МФЙда жойлашган бўлиб бино 420 ўринга мўлжалланган. Ҳозирги кунда 400 нафар ўқувчи 18 та синфда таълим олмоқда. Дарслар 2 сменада ташкил этилган бўлиб, 1- сменада 13 та синф, 2- сменада 5 та синф таҳсил олмоқда. Синф хоналари замонавий мактаб лойиҳаси талабларига жавоб бермайди. Ўқувчилар учун етарлича шарт-шароитлар муҳайё эмас, кимё, биология хоналарида лаборатория хоналари мавжуд эмас. Ўқувчиларга таълим-тарбия бериб келаётган 46 нафар ўқитувчининг 45 нафари олий маълумотли, 1 нафари ўрта махсус маълумотга эга. Бугунги кунда замон талаби ёшларни тил билишга, интеллектуал салоҳиятини ривожлантиришга чорламоқда. Демак, талабга мос таълим ҳам берилиши керак мактаб директорининг сўзларига қараганда, мактабда бир нафар инглиз тили ўқитувчиси фаолият юритади, ушбу мутахассислик бўйича яна бир нафар ходим олишга эҳтиёж сезаётганини таъкидлади. Мактабнинг умумий аҳволи оғир мактаблар сафига киради. Бино 1985 йилда қурилган. Бугунги кунда мукаммал таъмирга муҳтож.

Мактабнинг фаоллар зали, ошхонаси ва қўшимча биноси авария  ҳолатида.  Ачинарлиси бугун соғлом турмуш тарзини тарғиб қилиб ёшларимизни спорт билан кўпроқ шуғуллантириш борасида кўплаб саъй-ҳаракатлар амалга оширилаётган вақтда ушбу мактабда таҳсил олаётган ўқувчилар учун  спорт зал ҳам мавжуд эмас.  2020-2021 ўқув йили куз қиш мавсуми бўйича иссиқликни таъминлаш учун  кўмирдан фойланишган. Яъни, табиий газ билан таъминланмаган. 2020 йилда мактабда 3 дона иситиш қозонлари қурилган, қозонхоналарга  иссиқ сув айланиши учун насослар ўрнатилган бўлиб, электр токи узилишлари бўлмаса иссиқлик доимий жойида. Мактаб ўқувчилари 100% дарсликлар билан таъминланган. 2020-2021 ўқув йилида 24 нафар кам таъминланган ўқувчилар бепул дарсликлар берилган.

2019-2020 ўқув йилида мактабнинг 11-синфини 20 нафар ўқувчи битирган бўлиб, Республикамиздаги олий таълим муассасаларига 2 нафар, техникумларга 2 нафар битирувчилар ўқишга кириш имкониятини қўлга киритган.  Қолган  битирувчиларнинг  9 нафари кейинги йилга олий таълим муассасаларига ўқишга тайёрланмоқда, 3 нафари устоз шогирдликка бормоқда, 2 нафари ишга жойлашганлиги тўғрисида мактаб маъмурияти томонидан маълумотлар берилди.

Санжар МАЙДОНОВ

Ўзбекистон “Адолат” СДПнинг Бухоро вилоят кенгаши

 Раис ўринбосари.