Устозлар шарафланди

Шу кунларда мамлакатимизнинг барча шаҳар-қишлоқларида Устоз ва мураббийлар куни муносабати билан тантанали тадбирлар ўтказилмоқда. Ёш авлодга илм-фан сирларини ўргатаётган инсонлар Наманган шаҳрининг  Давлатобод туманида ҳам шарафланди. Муҳандислик-технология институти, техникумлар, умумтаълим ва касб таълими мактабларида улар шаънига ажойиб сўзлар айтилди.  Кейинги йилларда таълим сифатига қаратилаётган эътибор, ўқитувчи-мураббийларга кўрсатилаётган ғамхўрликлар ҳамда соҳада юз бераётган янгиланишлар ҳақида атрофлича фикр юритилди.

Олимпия заҳиралари коллежи жамоаси иштирокида ўтказилган тадбирда ҳам  устоз ва мураббийларнинг юқори малакали спортчиларни тарбиялаш борасида олиб бораётган ибратли ишлари алоҳида қайд этилди. Мазкур ўқув юртида таҳсил олганлар орасида миллий чемпионатлар, қитъа ва дунё биринчиликлари совриндорлари, республика терма жамоалари аъзолари, халқаро турнирлар ғолиблари  кўплаб топилади. Ҳозир таълим олаётган йигит-қизлар орасида ҳам истеъдодли спортчилар кўп.

Тадбир қатнашчилари ҳузурида сўзга чиққан вилоят касбий таълимни ривожлантириш ва мувофиқлаштириш бошқармаси бошлиғи Баҳодир Тожиматов, коллеж директори Акрам Дадабоев, “Адолат” СДП туман кенгаши раиси Венера Отажонова ва бошқалар жамиятда ибрат намунаси, юксак инсоний фазилатлар тимсоли бўлган меҳридарё устозларни умумхалқ байрами  билан самимий табрикладилар. Улардан бир гуруҳига фахрий ёрлиқлар ва эсдалик совғалари топширилди. Байрам хушовоз хонандалар, ёш истеъдодларнинг дилтортар куй-қўшиқлари, жўшқин рақслари билан янада файзли ўтди.

 – Мазкур коллеж биз билан яқиндан ҳамкорлик қилаётган муассасалардан ҳисобланади, - дейди В. Отажонова. – Улар партиямиз туман кенгаши ўтказадиган тадбирларда доим фаол қатнашадилар. Педагоглар орасида “Адолат” СДП аъзолари ҳам бор. Шунинг учун бугунги тантанада иштирок этдик ва жамоани касб байрами билан қутладик.

“Адолат” СДП Наманган вилоят Кенгаши матбуот хизмати