«Ватан келажаги ёшлар қўлида» лойиҳаси доирасида тадбир ўтказилди

Президентимиз томонидан илгари сурилган Беш ташаббус лойиҳаси ва «Адолат» СДПнинг «Ватан келажаги ёшлар қўлида» лойиҳалари доирасида Шайхонтоҳур туманидаги 192 сонли умумтаълим мактабида маданий-маърифий тадбир ўтказилди.

Тадбирда «Адолат» СДП Тошкент шаҳар Кенгаши, депутатлар, Аёллар ва Ёшлар қаноти фаоллари, мактаб ўқитувчи ва ўқувчилари ва ўқувчиларнинг ота-оналари иштирок этди.

Маълумки, Президентимиз томонидан илгари сурилган Беш ташаббус лойиҳасида илгари сурилган мақсадларда ёшларнинг мусиқа, рассомлик, адабиёт, театр ва санъатнинг бошқа турларига қизиқишларини ошириш, ёшларни жисмоний чиниқтириш, уларнинг спорт соҳасида қобилиятини намоён қилишлари учун зарур шароитлар яратишга йўналтириш, аҳоли ва ёшлар ўртасида компьютер технологиялари ва интернетдан самарали фойдаланишни ташкил этиш, ёшлар маънавиятини юксалтириш, улар ўртасида китобхонликни кенг тарғиб қилиш бўйича тизимли ишларни ташкил этиш, хотин-қизларни иш билан таъминлаш каби масалаларни назарда тутилган.

Мазкур тадбирда мактаб ўқувчилари ўзларининг бор иқтидор ва истеъдодларини намоён этишди. Давлат мадҳияси билан бошланган тадбир аввали ўқувчиларнинг турли хилдаги саҳна кўринишларию, кўнгилочар чиқишларига уланиб кетди. Ижро этилган чиройли рақслар эса барчага бирдек ҳуш кайфият бағишлади. Шунингдек, IT йўналишида ихтиролар қилган мактаб ўқувчилари ўз лойиҳаларини иштирокчиларга тақдим этишди. Спортнинг миллий кураш, таеквандо, шахмат-шашка, бокс каби йўналишларидаги чемпионлик камарини қўлга киритган ўқувчилар алоҳида мактаб фахри эканлигига урғу берилди. Бир неча жаҳон тилларини эгаллаган ўқувчилар эса саҳнада ўз билимларини намоён этишди. Қўлда ясалган санъат буюмлари кўргазмаси ҳам ўтказилди.

Қизиқарли ва таассуротларга бой ўтган тадбир давомида мактаб директори, Халқ депутатлари Шайхонтоҳур туман Кенгаши депутати Дилдора Исломова ўқувчиларни янада шижоатга ундовчи, руҳлантирувчи дил сўзларини баён этди. Ташриф буюрган меҳмонларга байрамона дастурхон безатилди. Баҳорнинг илк кунидаги ушбу тадбир барчани баҳорий кайфият билан хушнуд этди.

Меҳринисо БОБОНАЗАРОВА,

«Адолат» СДП Тошкент шаҳар Кенгаши матбуот котиби