Ёниқ юракли етакчи бош бўлган жой жаннатмаконга айланади

Аввал хабар берганимиздек,  Шовот туман Кенгаши депутати Жамолбек Қуранбоев тумандаги “Янги обод”  МФЙ раислигига бўлиб ўтган сайловда халқимиз ишончини қозониб,   ғолибликни қўлга киритган эди.

Партиянинг туман  Кенгаши раиси Меҳриноз Абдиязованинг   депутатимиз  маҳаллада  катта ишларни бошлаб юборгани тўғрисидаги хабари ва фото лавҳаларидан қалбимиз қувончга тўлди.

Соҳанинг ривожида  етакчиларнинг ўрни жуда муҳим.  Шу ўринда,  маҳалланинг обод бўлиши, маҳалла аҳолисининг   турмушидан рози бўлиб  яшаши  албатта маҳалла раисининг жонкуярлиги ва  халқпарварлигига боғлиқ.

Жамолбек  Қурбоновнинг  партиямизда депутат сифатидаги самарали фаолияти ҳам қисқа давр ичида сайловчилари билан бир қаторда  партия  фаолларининг эътиборига тушиб улгурган эди.

Депутат МФЙ раиси сифатида маҳалла аҳолисини ҳайратлантирар даражадаги ишларни бошлаб юборгани  маҳалла аҳлига  байрамона кайфият улашмоқда.

Унинг маҳалладаги илк иши  касалманд, ногиронлиги бор, боқувчисини йўқотган  оилаларда бўлиб, уларнинг ҳолидан хабар олди, кўнгли ўксик  инсонларга ҳам руҳан ҳам моддий ёрдам кўрсатиб, уларни кўнгилларини тоғдек кўтарди, дуоларидан баҳраманд бўлди.

Тиниб – тинчимас партиядошимиз маҳалладаги ички йўлларни  таъмирлаш, маҳаллага зарур бўлган  “болалар майдончаси” , кекса - нуронийлар учун  “дам олиш маскани”   қуриш ишларини бошлаб юборди.

Маҳалла аҳолисининг қувончи чексиз. Маҳаллада оламшумул ўзгаришлар  бўлаётганидан  ёш, юрагида ўти бор  депутатимиздан миннатдор эканини билдиришмоқда.

Мақсадлари бисёр ёш депутатимиз билан  суҳбат чоғида  маҳалла ҳудудини  шаҳар миқёсидаги  кўринишга олиб келмагунча  кўнгли таскин топмаслигини англадик ва омадлар тиладик. 

Дарҳақиқат, ёниқ юракли  етакчи бош бўлган  жой  жаннатмаконга айланади, унда эса  инсонлар қадр-қиммати улуғланади, қадрланади, юксалади. 

                                                                                         Замира АБДУЛЛАЕВА,

       “Адолат” СДП Хоразм вилоят Кенгаши

матбуот котиби