Ёш адолатчи спортчилар  соврин эгалари бўлишди

Маълумки, ҳозирги кунда Давлатимиз раҳбарининг  ташаббуси билан  миллий спорт турларига алоҳида эътибор қаратилмоқда ва зарур имкониятлар, шарт-шароитлар яратилиб берилмоқда.

Бунга жавобан, янгибозорлик  партиядошимиз  Бекберган Болтаев етакчилигидаги ёш адолатчи полвонлар фаолликни қўлдан беришмаяпди.

Фарғона вилоятида  катталар ўртасида “Ҳамит палвон” ва “Темур палвон” хотирасига бағишлаб ўтказилган Республика мусобақасида  Олий тоифадаги ҳакам, партиядошимиз Бекберган Болтаев етакчилигидаги бир гуруҳ ёш адолатчи спортчилар ҳам иштирок этиб совринли ўринларни қўлга киритишди.

Ёш адолатчиларимиздан Нусрат Юлдашев  73 кг вазнда фахрли 2 ўринни қўлга киритиб,  “кумуш” медал билан,  81 кило вазнда Оғабек Аматбаев фахрли 3 ўринни қўлга киритиб,  “бронза” медаль билан тақдирландилар.

Мусобақада ғолиб ва совриндорлар Фарғона вилояти ҳокимлиги томонидан қиммат баҳо совғалар билан тақдирландилар.

Нусрат Юлдошев, совриндор:

–  Бўлиб ўтган мусобоқада  воҳамизни, яқинларим ва устозларимни юзини ёруғ қилишим керак, деган  масъулият ўз кучини кўрсатди.  200 дан зиёд тажрибали спортчилар ўртасида  2-ўринни эгаллаб, совриндор бўлганимдан янада  куч ва шижоатга тўлдим. Барча истеъдодимни юртим келажаги учун сафарбар қилиб, навбатдаги мусобақаларда 1-ўринни эгаллашга ишонч билдираман.

Бекберган Болтаев, олий тоифадаги ҳакам:

–  Республика ва жаҳон мусобақаларида ҳар гал иштирок этганимизда орқамизда турган Давлатимиз, Хоразм воҳамиз, Янгибозор тумани ҳамда  вилоят спортни ривожлантириш бошқармаси,  “Адолат” СДП Хоразм вилоят Кенгашининг қўллаб-қувватлашлари, бизга билдирган ишончи доим руҳлантириб туради. Воҳамиздан ҳам жаҳон чемпионларининг сони ортиб бораётгани Янги Ўзбекистонимизни жисмонан соғлом ва маънан ютуқ ёшларимиз билан барпо этишимизга хизмат қилади.

Юртимиз шаъни учун кечаю кундуз тиним билмасдан меҳнат қилаётган спортчиларимизга  келгуси спорт мусобақаларида  юксак парвозлар тилаймиз. 

 Замира АБДУЛЛАЕВА,

    “Адолат” СДП Хоразм вилоят Кенгаши

матбуот котиби