Ёш иқтидор эгаларини кашф этган танлов

Ўсиб келаётган ёш авлодни она ватанга муҳаббат руҳида тарбиялаш, улар орасидан иқтидорлиларни аниқлаш ва уларни қўллаб-қувватлаш мақсадида республикамиз бўйлаб  партиянинг “Ватан келажаги ёшлар қўлида” лойиҳаси доирасида “Конституция билимдони” кўрик-танловининг республика босқичи якунланди. Республика босқичида вилоятимиздан фаол иштирок этган ИИВ Бухоро академик лицейи ўқувчиси Тофиқбек Акрамов фахрли 3-ўринни эгаллади.

Шу муносабат билан партия Бухоро вилоят Кенгаши ташаббуси билан вилоят Кенгаши фаоллар залида республика босқичида фаол иштирок этган Тофиқбек Акрамовни тақдирлаш маросими ташкил этилди.

Тадбирда сўзга чиққан партия вилоят Кенгаши раиси Мақсуд Ҳамидов, энг аввало Тофиқбек Акрамовни ютуғи билан табриклади, қолаверса, мана шундай иқтидорли ва ҳар томонлама чуқур билимга эга ўқувчиларни етиштираётган ўқитувчиларига ўз миннатдорчилигини билдирди. Ҳар бир маҳалла, туман, вилоят ва давлат мана шундай билимли, зукко қобилият эгалари билан дунёга танилади. Шундай экан, Тофиқбекка ўхшаган билимли, ҳар томонлама илғор ёшларимиз сафи тобора кўпаяверсин, - дейди, вилоят кенгаши раиси Мақсуд Ҳамидов.

-Мамлакат ижтимоий-сиёсий ҳаётида ёшларнинг фаоллигини ошириш, иқтидорли ёшларини аниқлашга қаратилган танловларнинг ўтказилиши ёш қобилият эгаларини кашф этишга ёрдам беради, - дейди, халқ депутатлари шаҳар Кенгаши депутати Абдурауф Аҳмедов, биз ҳам янги иқтидор эгасини ўзимиз учун кашф этдик, Тофиқбекка бундан кейинги иш ва ўқишларида ҳам улкан омадлар тилаб қоламиз.

-Конституция – адолатнинг бош мезонидир, инсон ўз ҳаётини борлиққа, унинг қонунларига эътибор бермай ташкил эта олмайди, республика миқёсида ўтказилган кўрик-танловда қатнашишнинг ўзи инсондан катта билим ва меҳнат талаб қилади, мана шундай серқирра, ҳар томонлама билимли ёшларимизнинг борлиги устозларининг ва албатта ота-онасининг бахтидир, - дейди партия вилоят Кенгаши раиси ўринбосари Рауф Сувонов.

Тадбир сўнгида партия вилоят Кенгаши томонидан Тофиқбек Акрамовга фахрий ёрлиқ ва қимматбаҳо эсдалик совғаси топширилди.

Биз ҳам юртимизда Тофиқбекка ўхшаган билим эгаларини кўпайишини чин дилдан истаб қоламиз, зеро, ватан келажаги ана шундай билимли, ҳар томонлама илғор ёшларимиз қўлидадир.

“Адолат” СДП Бухоро вилоят Кенгаши матбуот хизмати