Ёшлар учун “Очиқ эшиклар куни” ҳамда беллашувлар

Бувайда тиббиёт коллежида халқ депутатлари Фарғона вилоят Кенгаши депутати Нодиржон Жумабоев ташаббуси билан «Очиқ эшиклар куни» ўтказилди.

Умумтаълим ўқувчиларини  касбга йўналтириш, уларда тиббиёт соҳасига бўлган қизиқишни юксалтириш мақсадида коллеж ёшлар учун мақсад майдонига  айланди.  Иштирокчилар яратилган шароитлар билан танишди. Инсон саломатлигини асраш йўлидаги мазкур касбнинг моҳиятини  ва аҳамияти  уларга тушунтирилди. Шунингдек, таълим даргоҳида Наврўз айёми муносабати билан  тадбир ташкил этилди.

Байрам  тадбирида коллежнинг ўқувчи қизлари иштирокида  кўрик- танлов ўтказилди. Баҳорий салатлар тайёрлаш, дастурхон тузаш, сабзи тўғраш ҳамда ош дамлаш  каби шартлардан иборат танловда  қизларни оилага тайёрлаш, уларни  уй-рўзғор ишларини бажаришга лаёқатини шакллантириш, ибратли бекажонга айлантириш каби жиҳатларга эътибор қаратилди. Шунингдек, қизиқарли викторина ўйинлари, бадиий ва театлаштирилган чиқишлар иштирокчилар эътиборига ҳавола этилди. Санъат ихлосмандларининг дилтортар куй-қўшиқлари  барчага янада кўтаринки кайфият улашди.

– Ёшларимизни ҳар жиҳатдан ҳаётга тайёрлаш, уларни беллашувлар асосида маҳоратини оширишда  соҳасидан қатъий назар ҳар бир фуқаро масъулдир, – дейди депутат. –  Энг муҳим  эртамиз эгалари  ўз лаёқати, имкониятларини тўла намоён эта олсин. Ўргансин, излансин.  Касб танлаш, жамиятда ўз ўрнига эга бўлишда  аниқ мақсад ва режаларга эга бўлсин.  Тадбирлардан кўзланган мақсад ҳам шундай.  

Тадбирнинг фаол иштирокчилари партиянинг қимматбаҳо эсдалик совғалари билан тақдирланди.

 “Адолат” СДП Фарғона вилоят Кенгаши

Матбуот хизмати