Юртимизга хос саховатпешалик

Мамлакатимизда  инсон бошига қийин кун тушадими, байрам кунлари бўладими, саховатпеша ҳамюртларимиз  кўнгли кемтик инсонларга хурсандчилик улашишга доим тайёр туришади.

Шу боис ҳам,  Ўзбекистонимиз саховатпешалар юрти номи билан дунё ҳамжамиятида муносиб ўрин олгани бежиз эмас.

Бугун Урганч шаҳар Кенгашининг ёш депутати Равшанбек Жуманиёзовнинг байрам олди фаолиятининг бир кунига ҳамкорлик қилар эканмиз, қишнинг совуғига қарамай, унинг гоҳ  у хонадон, гоҳ бу хонадонга  кириб,  юраги кемтик  фуқароларга ёниқ юраги билан   ҳам руҳан ҳам моддий томондан байрамона кайфият улашаётганидан биз ҳам бир  олам завқ олдик.

Депутат  ташаббуси билан, шаҳар ҳокимлиги, Маҳалла ҳайрия жамоат фонди Урганч шаҳар бўлинмаси қошидаги саховат ва кўмак жамғармаси билан ҳамкорликда ва бир қатор тадбиркорларни жалб қилган ҳолда,  “Юқори боғ” маҳалласидаги  45 нафар кам таъминланган, боқувчисини йўқотган, ногиронлиги бор оилаларга  байрам совғалари улашди.

Фароғат Бобожанова, фуқаро:

-Депутатимиз доим уйма-уй юриб, ҳолимиздан хабар олиб, дардимизга малҳам бўлади. Муаммоларимизни бартараф этиб, ҳар бир байрамда бизни эътиборсиз қолдирмайди. Ширин сўзларию совға-саломлар билан хурсандчилик бағишлаб кетади. Илоҳим мартабалари улуғ бўлсин. Муносиб номзодни танлаганимиздан хурсандмиз.

Дарҳақиқат, Равшанбек Жуманиёзов ёш бўлишига қарамасдан сайловчилари қалбидан жой олиб улгурди. Уни доим сайловчиларининг дарди билан югуриб, елиб юрганининг гувоҳи бўламиз.

Бир сўз билан айтганда, партиямиз фаолларининг бу каби жонкуярлиги,  юртдошларимизнинг яшаш шароитларини яхшилаши орқали  мамлакатимиз тараққиётини ривожлантиришда аҳамиятлидир.

                                                                                                 Замира АБДУЛЛАЕВА,

                                                                                                               “Адолат” СДП

                                                                          Хоразм вилоят Кенгаши матбуот котиби