Жиззахда “Сайлов ва ёшлар” шиори остида учрашув ташкил этилди

Бугун ёшларга бўлган эътибор кун сайин ортиб, уларнинг билим олишлари билан бир қаторда, мамлакатимиз ижтимоий ҳаётидаги ҳар бир жараён билан яқиндан таниш бўлишлари ҳам муҳим саналади. Шу сабаб ҳам бу борада турли тадбирлар, учрашувлар, семинарлар ташкил этилмоқда.

Жумладан, ёшларнинг бу йилги мамлакатимиз парламенти ва халқ депутатлари маҳаллий кенгашларига сайловлар жараёнларидаги иштирокини таъминлаш ҳамда электорал маданиятини  ошириш мақсадида ИИВга қарашли Жиззах академик лицейида “Сайлов ва ёшлар” шиори остида сиёсий партиялар ва ёшлар учрашуви ташкил этилди.

Тадбирда бешта сиёсий партия вакиллари, Ўзбекистон ёшлар ишлари агентлиги Жиззах вилоят бошқармаси вакиллари ҳамда фаол ёшлар иштирок этишди.

Тадбирда Ўзбекистон “Адолат” СДП Жиззах вилоят Кенгаши раиси сўзга чиқиб, мамлакатимизда жорий йилги депутатлик сайловларини юқори савияда ташкил этиш учун олиб борилаётган ишлар, сайловда ёшларнинг иштирок этиш ҳуқуқлари, сайлов қонунчилигидаги ўзгаришлар, сайлов ҳуқуқлари эркинлигини таъминлаш борасида амалга оширилаётган ишлар, шунингдек, “Адолат” социал-демократик партиясининг ғоялари ва сайловолди дастурида кўзда тутилган муҳим ташаббуслари, партия томонидан амалга оширилган лойиҳалар тўғрисида ёшларга маълумотлар бериб ўтди. Бундан ташқари, сайловларда илк маротаба иштирок этаётган ёшларнинг доимий равишда ўзларининг сиёсий-ҳуқуқий билимларини ошириб боришлари, уларнинг жамиятимизнинг ижтимоий-сиёсий ҳаётида фаол иштирок этишлари, мамлакатимизда амалга оширилаётган ижтимоий-иқтисодий ва сиёсий-ҳуқуқий соҳалардаги кенг қамровли ислоҳотларнинг самараси ва таъсирчанлигининг ошишига хизмат қилишини таъкидлаб ўтди.

Тадбир жараёнида бошқа партия вакиллари ҳам сўзга чиқиб, ўз фикр-мулоҳазаларини билдириб ўтдилар. 

Фикр ва мулоҳазаларга, таклиф ва тавсияларга бой бўлган тадбир сўнгида йиғилганларнинг қизиқтирган саволларига атрофлича, ҳаётий мисоллар билан масъуллар томонидан жавоблар қайтарилди. 

Шахноза СОАТОВА,
“Адолат” СДП
Жиззах вилоят Кенгаши
матбуот котиби