Isteʼmol qilinmagan suv uchun toʻlovga majbur qilingan aholi muammosi deputat koʻmagida hal etildi

Avval xabar berganimizdek, Oliy Majlis Qonunchilik palatasidagi “Adolat” SDP fraksiyasi aʼzosi Abdugʻani Umirovning Nishon tumani aholisi oʻrtasidagi uchrashuvlari barchaga manzur boʻlayotir. Deputat oʻz saylovchilari orasida mamlakatimizning istiqboldagi taraqqiyotini taʼminlaydigan Konstitutsiyamizda kiritilayotgan oʻzgartirish va normalarni keng targʻib etayotir. Ayniqsa targʻibot tadbirlari seminar va erkin muloqot asosida uyushtirilayotgani oddiy fuqarolarning faolligini taʼminlayapti. Ha, xalqimiz yangilanayotgan Konstitutsiyaga va 30-aprelda boʻlib oʻtadigan referendumga befarq emas.

Bugun Abdugʻani Umirov fuqarolarni qiynab kelayotgan muammolarni oʻrgandi. Deputat Kaptarli MFY da boʻlganida fuqaro Turgʻunoy Jumayeva farzandi sartaroshxona ochish uchun qiynalayotganligini maʼlum qildi. Deputat ushbu masalada mahalladagi hokim yordamchisiga tegishli koʻrsatmalar berdi va 23-maktab yonida koʻchma doʻkon oʻrnatishga fuqaroga joy berildi. Koʻksoy MFY fuqarolari Dilorom Himmatova, Oyjamol Bekamova, Umida Abdumurodovalar mahalladan bola puli olisha olmayotgani va bunga yordam berishini soʻrab deputatga murojaat qilishdi. Abdugʻani Umirov voyaga yetmagan farzandlarini tarbiya qilayotgan onalarga bolalari uchun bola puli olishlariga amaliy yordam berdi.

-Men Kaptarli MFY da yashayman,-dedi Sherqul Norqobilov.-Farzandim Sherjon Norqobilov 1990-yilda tugʻilgan nogiron. Unga ancha paytdan buyon nogironlik nafaqasini ololmay kelyapman. Shu masalada deputatga murojaat qilgan edim, muammo hal boʻldi. Deputat tuman tibbiyot birlashmasi rahbariga tegishli tahlil va tekshirishlar oʻtkazib nogironlik nafaqasiga chiqarilishiga koʻrsatma berdi.

Shu mahalla fuqarosi Muhabbat Boʻtayeva oʻzi kabi qishloqdoshlarini qiynab kelayotgan ichimlik suvi toʻlovi borasidagi muammoni hal qilishga koʻmak koʻrsatishini soʻrab deputatga yuzlandi. Deputat xonadonlardagi holatni oʻrganganda haqiqatdan ham aholi isteʼmol qilmagan suv uchun toʻlov qilishga majbur qilinayotgan aniqlandi. Ushbu muammoni bartaraf etish uchun deputat fuqarolarga davlat xizmatlariga ariza topshirib hisoblagich orqali toʻlovni shakllantirish lozimligi xususida huquqiy maslahat berdi.

Nodir Isomov,
deputat yordamchisi.