Fuqarolarga yengilliklar berilyapti

Kuni kecha Oliy Majlis Qonunchilik palatasining navbatdagi majlisida “Ijro hujjatlarini ijro etmaganlik uchun solinadigan ma’muriy jarima miqdorini belgilash tartibi takomillashtirilishi munosabati bilan O‘zbekiston Respublikasining Ma’muriy javobgarlik to‘g‘risidagi kodeksiga o‘zgartirishlar va qo‘shimcha kiritish haqida”gi qonun loyihasi qabul qilinib, Senatga yuborildi.

Qonun bilan Majburiy ijro byurosi tomonidan qo‘llaniladigan ma’muriy jarimaning miqdori ijro hujjatida undirilishi belgilangan summadan yuqori bo‘lishi mumkin emasligi belgilanmoqda. Qolaversa, Kodeksning 198-1-moddasi 1-qismi sanksiyasida belgilangan jarimaning minimal miqdoriga doir cheklov olib tashlanmoqda.

Shuningdek, Byuro nomidan ma’muriy huquqbuzarliklar to‘g‘risidagi ishlarni ko‘rib chiqishga hamda ma’muriy jazo qo‘llashga faqat O‘zbekiston Respublikasining Bosh davlat ijrochisi, Qoraqalpog‘iston Respublikasi, viloyatlar va Toshkent shahrining bosh davlat ijrochilari, ularning o‘rinbosarlari, shuningdek, Majburiy ijro byurosining tuman (shahar) bo‘limlari boshliqlari haqli ekanligi haqida MJtKning 245-3-moddasiga tegishli o‘zgartish kiritilayotgani yana bir muhim yangiliklardan biri bo‘ldi.

Mazkur qonun fuqarolarning huquqlari, erkinliklari va qonuniy manfaatlari ishonchli himoya qilinishini ta’minlashga, jarimalarni to‘lashda fuqarolarga yengilliklar berilishiga, Majburiy ijro byurosi tizimida nazorat kuchaytirilishiga va suiiste’molchiliklar hamda korrupsion holatlarning oldi olishga xizmat qiladi.

Muhammadjon VALIYEV,

Oliy Majlis Qonunchilik palatasi deputati