“Adolat” — 28 yoshda

1995-yil 18-fevralda poytaxtimizda ilk bor boʻlib oʻtgan Oʻzbekiston “Adolat” sotsial-demokratik partiyasining taʼsis Qurultoyida Vatanimiz mustaqilligini yanada mustahkamlash, respublikada demokratiyani rivojlantirish, huquqiy davlat qurish jarayonlarini takomillashtirish, qonun ustuvorligini taʼminlash maqsadlaridan kelib chiqqan holda siyosiy partiya tuzish yuzasidan qaror qabul qilindi.

Ahamiyatlisi, “Adolat” nomini olgan ushbu yangi partiya oʻsha vaqtda nafaqat mamlakatimizda, balki butun Markaziy Osiyoda yagona sotsial-demokratik yoʻnalishdagi siyosiy partiya boʻldi. Oʻzbekiston “Adolat” SDP siyosiy maydonga chiqqan ilk kunlardanoq ijtimoiy adolat gʻoyasi tamoyilini ilgari surib, mamlakatda amalga oshirilayotgan barcha ijtimoiy-iqtisodiy oʻzgarishlarda faol ishtirok etib kelayotganini, aholining turli ijtimoiy qatlamlari manfaatlarini ifodalovchi jipslashgan kuch sifatida oʻzini koʻrsata olganini taʼkidlab oʻtmoq kerak. Siyosiy maydonga ijtimoiy adolat gʻoyasi bilan kirib kelib, mamlakatimizdagi barcha ijtimoiy-iqtisodiy oʻzgarishlarda faol ishtirok etib kelayotgan “Adolat” SDP oʻz elektorati manfaatlarini himoya qiluvchi odil kuch sifatida oldinga intilib bormoqda.

Partiya har doim huquqiy demokratik davlat, kuchli va adolatli fuqarolik jamiyatini barpo etish, ijtimoiy-iqtisodiy barqaror turmush tarzini shakllantirish kabi dolzarb jarayonlarda oʻz rolini kuchaytirishni maqsad qilib qoʻygan.

Taʼsis etilgan yili 3400 kishini tashkil etgan boʻlsa, hozirda partiyamiz aʼzolarining soni 500 ming nafardan ortib borayotganligi “Adolat”ning aholi orasidagi taniluvchanligi va nufuzini oshib borayotganligining yorqin namunasidir.

“Adolat” SDP Matbuot xizmati