“Adolat” ning “Moʻtabar ayol”i

Oʻzbekiston Respublikasi Prezidentining “Xotin-qizlarni qoʻllab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari toʻgʻrisida”gi Farmoniga muvofiq “Moʻtabar ayol” koʻkrak nishoni taʼsis etilib, jamiyatimizda ijtimoiy faol xotin-qizlarni qoʻllab-quvvatlash, ularning el-yurt oldida koʻrsatgan xizmatlarini munosib ragʻbatlantirish maqsadida har yili bir guruh ayollar ushbu koʻkrak nishoni bilan mukofotlanadi. Bu yilgi 8-mart bayrami arafasida yana faol opa-singillarimiz ana shu mukofot sohibi boʻldi. Ular orasida andijonlik partiyadoshimiz Nasiba Toʻychiyeva ham bor.

U bunday eʼtirofga chindan ham munosib. Xalq deputatlari Andijon viloyat kengashi deputati sifatida jamoatchilik orasida sezilarli ishlarni amalga oshirmoqda. Qonunlarimizga kiritilayotgan oʻzgartishlarni jamoatchilikka oʻz vaqtida yetkazish, fuqarolarning huquqiy madaniyatini yuksaltirish, oila institutini mustahkamlash borasida olib borayotgan ishlari eʼtiborli. Oʻzi deputat etib saylangan Asaka tumanidagi muammolarning yechimini topishda ham tashabbus bilan chiqadi.

Yuqoridagilardan tashqari xalq deputatlari Andijon viloyat kengashi kotibiyat mudiri sifatida deputatlar bilan ishlashda ham faol. Uning tashabbusi bilan kengash muhokamasiga kiritilgan har bir masala yechimini topmoqda. Bu oʻz-oʻzidan jamoatchilikning deputat institutga boʻlgan ishonchini oshirmoqda.

Nasiba Toʻychiyeva, xalq deputatlari Andijon viloyat kengashi deputati:

-Oʻzbekiston Respublikasi Xotin-qizlar qoʻmitasi tomonidan taʼsis etilgan ushbu mukofot bizning arzimas mehnatlarimizga berilgan yuksak bahodir. Jamiyat va davlat hayotida faollik hamda tashabbuskorlik koʻrsatayotgan opa-singillarimiz bunga javoban yanada shijoat bilan ishlashni oʻz oldilariga vazifa qilib oldilar. Sogʻlom va barkamol avlodni voyaga yetkazish, ularni vatanparvarlik hamda istiqlol gʻoyalariga sadoqat ruhida tarbiyalash, joylarda maʼnaviy-axloqiy muhitni sogʻlomlashtirish yoʻlida yanada gʻayrat bilan ish olib boramiz.

“Adolat” SDP Andijon viloyat kengashi

Matbuot xizmati.